Ağır qəza oldu - 3 nəfər öldü, 2 yaralı var

Şəkidə baş vermiş ağır yol qəzasında 3 nəfər həyatını itirib, iki nəfər isə müxtəlif dərəcəli xəsarətlər alıb. Hadisə axşam saat 18 radələrində qeydə alınıb. Qəza Qaraməryəm-İsmayıllı-Şəki avtomobil yolunun Oraban kəndi ərazisindən keçən hissəsində baş verib.

Bu faciəvi hadisə hərəkətdə olan iki avtomobilin - "KIA" və "VAZ-2107" markalı nəqliyyat vasitələrinin toqquşması nəticəsində baş verib. Toqquşma zamanı avtomobillərdə olanlardan üç nəfər aldığı çox ağır xəsarətlərdən elə hadisə yerindəcə həlak olub. Qəzada iştirak edən digər iki nəfər isə ağır bədən xəsarətləri alıb.

Yaralı şəxslər təcili olaraq Şəki Rayon Mərkəzi Xəstəxanasının (RMX) Təcili Tibbi Yardım şöbəsinə yerləşdiriliblər. Onlara ilkin tibbi yardımlar göstərilir. Hazırda hüquq-mühafizə orqanları tərəfindən həlak olan və xəsarət alan şəxslərin kimlikləri dəqiqləşdirilir.