165 minə satdığı evi 155 minə geri aldı

Azərbaycanda qeyri-adi hadisə baş verib. Abşeron sakini üç ay əvvəl 165 min manata satdığı evi üç gün öncə 155 min manata geri alıb. Arif Məmmədov 7 il Abşeron rayonunun Masazır qəsəbəsində yaşayıb. O, səkkiz sot torpaqda öz zəhməti ilə ikimərtəbəli, dəbdəbəli ev inşa etmişdi. Ailəsi ilə birlikdə bu evdə gözəl günlər keçirsə də, nəqliyyat problemləri onu evini satmağa məcbur edib.

Məmmədovun dediyinə görə, son iki-üç ildə Masazırda vəziyyət dözülməz hala gəlib. Səhər işə gedəndə və axşam evə qayıdanda sakinlər bəzən 1,5, bəzən də 2 saat tıxacda qalırmışlar. Bu cür gərginlikdən qurtulmaq üçün o, üç ay əvvəl evini real dəyərindən xeyli aşağı qiymətə, yəni **165 min manata satmaq** qərarına gəlib. Əlində olan vəsaitlə Bakının mərkəzində ev ala bilməyən Arif Məmmədov və ailəsi üç ay müddətində kirayədə yaşamaq məcburiyyətində qalıblar. Hətta mərkəzə köçməsinə baxmayaraq, Masazırda yaşanan bu sıxlıq problemi gözlənilməz nəticələrə səbəb oldu.

Bir gün metroda Məmmədov evini satdığı şəxslə təsadüfən qarşılaşdı. Yeni mənzil sahibi dəhşətli tıxaclardan şikayət edərək, bütün yollarda qaldıqlarını bildirib. O qeyd edib ki, tələbə qızları universitetə gedib-gələ bilmədikləri üçün hər gün bir qohumun evində gecələməli olurlar. Arif Məmmədov onun peşman olduğunu hiss edib və elə oradaca bazarlıq edib. Xeyli çək-çevirdən sonra onlar 155 min manat qiymətdə razılaşdılar. Üç gün əvvəl pulu ödəyərək, sənədləri notarial qaydada öz adına keçirən Arif Məmmədov evi aldığı şəxsə mənzili boşaltmaq üçün bir ay vaxt verib.

Masazır sakini **tıxac probleminin** minlərlə insanı narahat etdiyini vurğulayıb. O bildirir ki, əlaqədar qurumlar bu məsələdə təxirəsalınmaz tədbirlər görməlidir. Məmmədovun sözlərinə görə, Bakıətrafı qəsəbələrin nəqliyyat məsələlərini həll etməklə paytaxtdakı sıxlığı azaltmaq və insanların rahat nəfəs almasını təmin etmək mümkündür.