Zahid Oruc: İlham Əliyev Ukrayna üçün xilas formullarını müxtəlif dövrlərdə göstərib

Milli Məclisin deputatı Zahid Oruc qeyd edib ki, Azərbaycan Prezidenti İlham Əliyev Ukrayna üçün fərqli dövrlərdə xilas formullarını göstərib. Deputat bu fikirləri “Report”a verdiyi açıqlamasında dilə gətirib. Orucun sözlərinə görə, ABŞ Prezidenti Donald Trampın Ukrayna üçün irəli sürdüyü sülh planı hazırda dünyada əsas müzakirə mövzularından biridir.

Zahid Oruc vurğulayıb ki, Donald Tramp ikinci prezidentliyi dövründə bütün diqqətini Rusiya-Ukrayna müharibəsinin dayandırılmasına yönəldib. O, bu məqsədlə əlində olan bütün təsir imkanlarından istifadə edir. Tramp əvvəlcə Avropa Birliyini bu savaşı maliyyələşdirməyə çağırdı, daha sonra isə iqtisadi təzyiqlə cavab verdi. Bu təzyiqlər nəticəsində həm NATO üzvləri, həm də Ukrayna həmin şərtlərə tabe olmağa məcbur edildi. Son zamanlarda baş verən Pokrovsk və Kupyansk əməliyyatları Rusiyanın mövqeyini xeyli gücləndirdi. Bu cür hərbi uğurlar Ukraynanı Qərb və Rusiya arasında sadəcə bazarlıq predmetinə çevirdi.

Prezident Volodimir Zelenski ölkəsinin daxili məsələlərində də böhranla üz-üzə qalıb. O, xalqa və dünyaya müraciət edərək təklif edilən 28 bəndlik müvəqqəti sülhün və ya atəşkəsin çox amansız olduğunu bildirdi. Deputat əlavə edib ki, Zelenskinin bu ağır şərtlərə imza atması Ukraynanın siyasi xəritədə əvvəlki formada qalmasını qeyri-mümkün edir.

Oruc daha sonra Ukrayna xalqının faciəsi fonunda Prezident İlham Əliyevin rəhbərliyi ilə Qarabağda qazanılan qələbənin mühümlüyünü anlamağın lazım olduğunu deyib. O bildirib ki, biz bu qələbənin hansı çətinliklər bahasına əldə edildiyini aydın bilirik. Azərbaycan öz haqlı müharibəsinə və ərazilərinin bərpasına heç bir kənar yardım görmədi. Baxmayaraq ki, Vətəni uğrunda döyüşən Ukrayna xalqı Azərbaycan tərəfindən rəğbət görür, Azərbaycan qələbədən sonra öz maliyyə resursları hesabına, yalnız xalqına güvənərək həmin ərazilərdə tikinti-bərpa işlərini aparır. Ukrayna üçün irəli sürülən sülh formulu Azərbaycanın qələbə ilə əldə etdiyi sülh formulundan xeyli dərəcədə fərqlənir. Azərbaycan xalqı və Türk dünyası bu qələbənin miqyasını düzgün dəyərləndirməlidir.