Yeni Konstitusiyanın qəbulu müstəqil Azərbaycanın tarixində ən mühüm hadisələrdən biridir – Deputat

Milli Məclisin deputatı Afət Həsənova bildirib ki, yeni Konstitusiyanın qəbulu müstəqil Azərbaycanın inkişaf tarixində baş verən ən vacib hadisələrdən biridir. Deputat qeyd edib ki, 1991-ci il oktyabrın 18-də qəbul edilmiş “Azərbaycan Respublikasının dövlət müstəqilliyi haqqında” Konstitusiya Aktında yeni Əsas Qanunun hazırlanması nəzərdə tutulmuşdu. Buna baxmayaraq, 1991-1993-cü illərdə hakimiyyətin səriştəsiz fəaliyyəti ölkədə vəziyyəti pisləşdirdi. Bu dövrdə dərin böhran, idarəetmədə xaos və anarxiya yaranmışdı. Dövlət institutları formalaşmamışdı, qanunçuluq pozulmuşdu, vətəndaşların təhlükəsizliyi və azad yaşamaq hüququ təmin edilməmişdi.

Yalnız xalqın tələbi ilə 1993-cü ildə yenidən hakimiyyətə qayıdan Ümummilli Lider Heydər Əliyev xilaskarlıq missiyası sayəsində bu təhlükəli proseslərə son qoydu. Onun rəhbərliyi altında ölkədə sabitlik bərpa edildi və müasir dövlət quruculuğu üçün möhkəm təməl qoyuldu. Heydər Əliyevin rəhbərliyi ilə Konstitusiya Komissiyası müstəqil Azərbaycanın ilk Konstitusiya layihəsini hazırladı. Bu layihə 1995-ci il noyabrın 12-də keçirilən ümumxalq referendumu ilə qəbul edildi. Seçicilərin 91,9 faizi sənədin lehinə səs verərək, ölkənin gələcək inkişaf istiqamətini müəyyənləşdirdi. Ulu Öndərin 15 dekabr 1995-ci il tarixli Fərmanına əsasən, hər il noyabrın 12-si Konstitusiya Günü kimi qeyd olunur.

Deputat vurğulayıb ki, Heydər Əliyevin Azərbaycan dövlətçiliyi qarşısında xidmətləri saysız-hesabsızdır. Ulu Öndər Konstitusiyanın hazırlanması və qəbulunda misilsiz rol oynayıb. Bu sənəd təkcə yeni ictimai-siyasi sistemin hüquqi əsaslarını müəyyən etmədi, həm də Azərbaycanın hüquqi və demokratik dövlət kimi inkişafının yeni mərhələsini başlatdı. Konstitusiya insan hüquq və azadlıqlarının, qanunun aliliyinin və demokratik dəyərlərin qorunmasını dövlət idarəçiliyinin mərkəzinə gətirdi. Yeni Konstitusiyanın qəbulu müstəqil, hüquqi və dünyəvi dövlətin bərqərar olması istiqamətində Heydər Əliyev ideyalarının həyata keçirilməsi üçün möhkəm hüquqi baza yaratdı.

Heydər Əliyevin irəli sürdüyü prinsiplər bu gün real həyatda öz təsdiqini tapır. Ulu Öndər deyirdi ki, "Biz elə bir layihə hazırlamalı və nəhayət, elə bir Konstitusiya qəbul etməliyik ki, o, müstəqil Azərbaycan Respublikasının demokratik prinsiplər əsasında uzun müddət sabit yaşamasını təmin edən Əsas Qanun, tarixi sənəd olsun." O, həmçinin vurğulayırdı ki, ali icra, qanunvericilik və məhkəmə hakimiyyətindən ibarət hakimiyyət bölgüsü xalqın iradəsinə söykənməli, seçkilər yolu ilə təmin olunmalıdır. Konstitusiyanın qəbulu dövlətçiliyimizin möhkəmləndirilməsi, Azərbaycanın dünya birliyində nüfuzunun artması baxımından çox mühüm ictimai-siyasi hadisə idi. Afət Həsənova qeyd edib ki, bu ideyalar bu gün Azərbaycanın qüdrətli, qalib və demokratik dövlət kimi inkişafının təməlini təşkil edir.