Viktor Orban: Putinlə görüşdə böyük sazişlər üçün qapılar açılıb

Macarıstanın Baş naziri Viktor Orban Rusiya Prezidenti Vladimir Putinlə görüşdən sonra mühüm bəyanat verib. Orban bildirib ki, noyabrın 28-də Moskvada keçirilən görüş zamanı iki ölkənin şirkətləri arasında bir neçə iri müqavilənin bağlanması imkanları müzakirə edilib. O, bu barədə "FİDES - Macarıstan vətəndaş İttifaqı" Partiyasının Nyiredhaz şəhərində keçirilən toplantısında danışıb. Baş nazir, bu görüşün tərəflər arasında iki və ya üç böyük sövdələşmə üçün qapıları açdığını qeyd etdi.

Bu danışıqların əsas diqqəti enerji tədarükü məsələlərinə yönəlsə də, Orban vurğulayıb ki, razılaşmaların yekunlaşdırılması hökumətin işi olmayacaq. Baş nazirin sözlərinə görə, bu tamamilə biznes məsələsi olacaq. O qeyd etdi ki, indi Macarıstanın enerji şirkəti olan MOL və digər müəssisələrin nümayəndələri razılığa gəlmək üçün işə başlayacaqlar. Orban Moskvaya səfərinin əsas məqsədinin Rusiyanın enerji daşıyıcılarının gələcək tədarükünü müzakirə etməkdən ibarət olduğunu təsdiqləyib.

Macarıstan Rusiyadan enerji idxalından asılılığını davam etdirir. Ölkə hələ də neftinin böyük hissəsini "Dostluq" boru kəməri vasitəsilə, qazı isə "Türk axını" kəməri ilə alır. Bu danışıqlar Macarıstanın gələcək illər üçün enerji ehtiyaclarını təmin etmək məqsədi daşıyırdı. Ölkənin Xarici İşlər Naziri Peter Siyartonun daha əvvəl verdiyi məlumatlar da bu ticarətin həcmini göstərir. Nazir bildirmişdi ki, 2025-ci ildə Rusiyadan Macarıstana 8,5 milyon ton neft və 7 milyard kubmetrdən çox təbii qazın tədarük olunması nəzərdə tutulur. Baş nazir Orbanın Moskva səfəri Macarıstanın Rusiya ilə enerji əməkdaşlığının davamlı xarakterini dəstəkləyən yeni ticarət sazişləri üçün zəmin yaratdı.