Uzunmüddətli reabilitasiya tələb edən travmalar – Nazirliyin mütəxəssisi aydınlıq gətirir

Travmatoloq Murad Davudov ən çox reabilitasiya tələb edən zədələnmələrin hansılar olduğunu açıqlayıb. Mütəxəssis qeyd edir ki, çoxsaylı sınıqlar, açıq sınıqlar, böyük oynaq çıxıqları və kompression sınıqlar xəstədən ən uzunmüddətli bərpa tələb edir.

O, bu fikirləri “Sağlam radio”nun (93 FM) efirində səsləndirib. Onun sözlərinə görə, bud, çanaq, onurğa, dirsək, çiyin, diz, eləcə də aşıq-baldır nahiyəsində baş verən sınıqlar zamanı da uzunmüddətli reabilitasiya tövsiyə oluna bilər. Bu tip sınıqlarda funksional bərpa prosesi çox mərhələli olur. Sümük və oynaqların tam sağalması, əzələ tonusunun bərpası, funksional hərəkətlərin qaytarılması xeyli vaxt aparır. Travma sonrası bərpa prosesi, yəni sınıqdan sonrakı sağalma zədənin növünə, yerinə və sağalma mərhələsinə görə dəyişir.

Reabilitasiya zamanı əsas məqsəd əzələnin gücünü, koordinasiyasını, hərəkətliliyini və funksiyanı tədricən bərpa etməkdir. Bu məqsədlə müxtəlif müalicə üsulları tətbiq edilir. Buna misal olaraq ultrasəs, maqnitoterapiya, elektrostimulyasiya, müxtəlif növ kompreslər və fizioterapiyanın digər prosedurlarını qeyd etmək olar. Bu prosedurlar sağalma prosesini sürətləndirməyə və əzələ tonusunu bərpa etməyə kömək edir.

Travmatoloq bildirir ki, bərpa prosesinə yüngül və ağrısız hərəkətlərdən başlamaq lazımdır. Bunlara passiv və aktiv hərəkətlər daxildir. Masaj, əzələ gücləndirici məşqlər və bu kimi prosedurların hər biri reabilitasiyaya aid edilir. İlkin mərhələlərdən sonra xəstə reabilitoloqun nəzarəti altında bərpanın daha aktiv mərhələsinə keçə bilər. Lakin bir mühüm məqama diqqət yetirmək lazımdır: əgər reabilitasiya dövründə şiddətli ağrı və ya şişkinlik yaranarsa, xəstə mütləq həkimə müraciət etməlidir.