Uzaqlarda olsam da, vətənimlə birlikdə nəfəs alıram - Məltəm Səfərli

Amerikada təhsil alan azərbaycanlı tələbə Məltəm Səfərli minlərlə kilometr uzaqda olsa da, Vətəni ilə nəfəs aldığını bildirir. O, hər səhər öz dilində xəbərləri oxumağı vərdiş edib. Səfərli son illərdə Azərbaycanın xarici siyasətdə qazandığı uğurları görməkdən, ölkənin beynəlxalq mövqeyinin möhkəmlənməsini izləməkdən qürur və ümid duyduğunu deyir. Prezident İlham Əliyevin liderliyi sayəsində Azərbaycanın beynəlxalq arenada layiqincə təmsil olunması bu uğurların əsas səbəbidir. Onun uzaqgörən siyasəti nəticəsində Azərbaycan bu gün regionda söz sahibi olan, qlobal miqyasda isə etibarlı tərəfdaş kimi qəbul edilən bir dövlətə çevrilib.

Azərbaycanın artan nüfuzu, xüsusilə ABŞ-la münasibətlərdə özünü aydın göstərir. ABŞ-Azərbaycan əlaqələri son illərdə enerji təhlükəsizliyi, terrorizmlə mübarizə, sülh təşəbbüsləri və iqtisadi əməkdaşlıq sahələrində daha da güclənib. Azərbaycanın Bakı-Tbilisi-Ceyhan və Cənub Qaz Dəhlizi kimi qlobal enerji layihələri Amerika Birləşmiş Ştatları tərəfindən daim dəstəklənir. Bu layihələr təkcə Azərbaycanın deyil, bütövlükdə Avropanın enerji təhlükəsizliyinə böyük töhfə verir. Mən ABŞ universitetində oxuyarkən professorların və tələbələrin Azərbaycanın enerji siyasətini nümunə kimi göstərdiyini eşitdikdə böyük qürur yaşadığımı söyləyirəm.

Prezident İlham Əliyevin xarici siyasətdə atdığı addımlar onu sadəcə dövlət başçısı deyil, həm də regionun lideri halına gətirib. Onun diplomatiyası səmimiyyət, uzaqgörənlik və millətinin gələcəyinə yönəldilir. Bu liderliyin bariz nümunəsi 2025-ci ilin avqustunda Vaşinqtonda Azərbaycan, ABŞ və Ermənistan liderləri arasında keçirilən üçtərəfli sammitdə imzalanan “Birləşmiş Deklarasiya”dır. Bu tarixi sənəd Ermənistan və Azərbaycan XİN-ləri arasında sülh və dövlətlərarası münasibətlər haqqında razılaşma layihəsini ilk dəfə rəsmi şəkildə təqdim etdi. Deklarasiyada tərəflər güc tətbiq etməməyi, sərhədlərin toxunulmazlığını tanımağı, kommunikasiya xətlərinin açılmasını və tranzit əlaqələrinin inkişafını öz öhdəliklərinə götürdülər. Deklarasiyanın mühüm hissəsi “Trump Route for International Peace and Prosperity” (TRIPP) adlanan yeni marşrut layihəsidir. Bu marşrut nəqliyyat, enerji kəmərləri, fiber-optik rabitə və yol infrastrukturunu birləşdirərək Ermənistan ərazisindən keçməklə Azərbaycanın əsas hissəsi ilə Naxçıvan arasında tranzit əlaqəsi yaradacaq. Bu, regionda yeni iqtisadi və strateji imkanlar açacaq.

2025-ci ilin sentyabrında Prezident Əliyev Birləşmiş Millətlər Təşkilatının 80-ci sessiyasında iştirak etmək üçün ABŞ-a işgüzar səfər etdi. Orada o, Brookfield Asset Management və Neuberger Berman kimi iri investisiya şirkətləri ilə görüşdü, əməkdaşlığı genişləndirməyi müzakirə etdi. Eyni zamanda ABŞ Prezidenti tərəfindən “Freedom Support Act”in 907-ci maddəsinə tətbiq edilən azadlıq istisnasının yenidən uzadılması da yüksək dəyərləndirildi. Bu, Azərbaycanla ABŞ arasında uzun illər davam edən ənənəvi maneələrdən birinin aradan qalxması kimi qiymətləndirilir. ABŞ dövlət rəsmilərinin dəstəyi ilə aparılan danışıqlar Cənubi Qafqazda sabitliyin təmin olunması istiqamətində atılan mühüm addımlardır. Ölkənin beynəlxalq nüfuzu artdıqca, təhsil, mədəniyyət və elm sahəsində əməkdaşlıq imkanları da çoxalır. Amerikada təhsil alan bir gənc kimi mən bu uğurların biz tələbələrə də yeni imkanlar açacağına inanıram. Uzaqlarda yaşasam da, əminəm ki, Azərbaycanla ABŞ arasındakı dostluq münasibətləri getdikcə daha da möhkəmlənəcək.