UNEC ilə “Rabitəbank” arasında əməkdaşlıq memorandumu imzalanıb (FOTO)

Azərbaycan Dövlət İqtisad Universiteti (UNEC) ilə “Rabitəbank” ASC arasında qarşılıqlı əməkdaşlığa dair memorandum imzalanıb.

Bu sənəd universitet və sənaye əlaqələrini gücləndirməyi, təhsil və bank sektoru arasında bilik və təcrübə mübadiləsini genişləndirməyi hədəfləyir. Memorandumu UNEC-in rektoru, professor Ədalət Muradov və “Rabitəbank” ASC-nin İdarə Heyətinin sədri Aydın Hüseynov imzalayıblar. Bu əməkdaşlıq çərçivəsində UNEC və bank bir çox istiqamətdə birgə fəaliyyət göstərəcəklər.

Razılaşmaya görə, tərəflər rəqəmsal bankçılıq və bank sahəsindəki müasir texnologiyalar haqqında təcrübə mübadiləsi aparacaqlar. UNEC-in Ömürboyu Təhsil Mərkəzi ilə birgə kommersiya yönümlü təlimlərin keçirilməsi də planlaşdırılıb. Bundan başqa, bank mütəxəssisləri UNEC-in tədris prosesinə mühazirəçi qismində cəlb ediləcək. Bu addım tələbələrin bilavasitə peşəkarlardan dərs almasına imkan yaradacaq.

Memorandumun əsas hissəsi tələbələr üçün nəzərdə tutulan imkanlardır. Sənəddə Rabitəbankda tələbələr üçün müxtəlif növ təcrübə proqramlarının, o cümlədən istehsalat təcrübələrinin təşkili əks olunub. Gənclər həmçinin birgə layihələrdə, konfrans, təlim və seminarlarda iştirak edə biləcəklər. Əməkdaşlıq çərçivəsində UNEC-də “Karyera günləri”nin təşkili də planlanır. Bütün bu fəaliyyətlər tələbələrin iş bazarına daha hazırlıqlı çıxmasına yardım edəcək.