Ukraynanın səhiyyə naziri ATU-nun fəaliyyətini yüksək qiymətləndirib

Azərbaycan Tibb Universiteti (ATU) Ukrayna ilə səhiyyə və tibb təhsili sahəsində əməkdaşlığı inkişaf etdirməyi müzakirə edib. Universitetin rektoru, professor Gəray Gəraybəyli Azərbaycanda işgüzar səfərdə olan Ukraynanın səhiyyə naziri Viktor Lyaşkonun rəhbərlik etdiyi nümayəndə heyətini qəbul edib. Professor Gəraybəyli qonaqları salamlayarkən, Azərbaycan və Ukrayna arasında dövlət səviyyəsində qurulmuş dostluq və əməkdaşlıq münasibətlərinin yüksək səviyyədə olduğunu vurğuladı. Rektor, həmçinin, tibb təhsili və səhiyyə sahəsində qarşılıqlı əlaqələri gücləndirməyin vacibliyini qeyd etdi.

Görüş zamanı rektor universitetin fəaliyyəti haqqında məlumat verdi. O, ATU-da beynəlxalq standartlara uyğun tədris sistemi, aparılan islahatlar, müasir elmi-tədqiqat istiqamətləri və beynəlxalq əlaqələrin genişləndirilməsi istiqamətində görülən işləri təqdim etdi. Gəraybəyli əlavə etdi ki, ATU artıq Ukraynanın Bogomolets adına Milli Tibb Universiteti, Xarkov Milli Tibb Universiteti və digər nüfuzlu müəssisələrlə əməkdaşlıq memorandumları imzalayıb. Rektor çıxışında İkinci Qarabağ müharibəsi zamanı Azərbaycanın hərbi həkimlərinin göstərdiyi fədakarlıq və peşəkarlıqdan söz açdı, eyni zamanda Ukrayna xalqına tezliklə sülh və rifaha qovuşmağı arzuladı.

Öz növbəsində, Ukraynanın səhiyyə naziri Viktor Lyaşko səmimi qəbula görə təşəkkür etdi və səfərin əhəmiyyətindən danışdı. Nazir Azərbaycan Tibb Universitetinin əməkdaşlarının fəaliyyətini və tibb elminin inkişafına verdikləri töhfələri yüksək qiymətləndirdi. Lyaşko qeyd etdi ki, iki ölkə arasındakı dostluq münasibətləri qarşılıqlı etimad və hörmət prinsiplərinə əsaslanır. O, səhiyyə, tibb təhsili və elmi işlər sahələrində əməkdaşlığın genişləndirilməsinin hər iki dövlət üçün faydalı olacağını bildirdi və bu sahədəki birgə təşəbbüslərin dəstəklənəcəyini vurğuladı.

Azərbaycan səhiyyə nazirinin müavini Nadir Zeynalov da görüşdə iştirak edərək Ukrayna Səhiyyə Nazirliyi ilə birgə həyata keçirilən uğurlu layihələrdən danışdı. O, xüsusilə tibb təhsilinin təkmilləşdirilməsi üzrə görülən işlərə diqqət çəkdi. Zeynalov nazirliyin ötən illər ərzində tibb sahəsindəki islahatlardan və mühüm fəaliyyətlərdən bəhs etdi. Görüş qarşılıqlı maraq doğuran birgə layihələrin həyata keçirilməsi, yeni əməkdaşlıq imkanlarının və gələcək tərəfdaşlıq istiqamətlərinin müzakirəsi ilə davam etdi.