Ukraynanın düşdüyü vəziyyət uzaqgörən və qətiyyətli lider faktorunu ön plana çıxarır - RƏY

Ukraynanın üzləşdiyi indiki ağır vəziyyət uzaqgörən və qətiyyətli liderin nə qədər əhəmiyyətli olduğunu bir daha göstərir. Milli Məclisin deputatı, Azərbaycan-Ukrayna parlamentlərarası əlaqələr üzrə işçi qrupunun üzvü Hikmət Babaoğlu bu barədə açıqlama verib.

O, ABŞ-nin Rusiya və Ukrayna arasında sülh təklifindən sonra Volodimir Zelenskinin xalqa müraciətini siyasi çarəsizliyin və beynəlxalq təzyiqin göstəricisi kimi qiymətləndirir. Babaoğlunun sözlərinə görə, beynəlxalq münasibətlər sistemi və siyasət həmişə uzaqgörənlik, müdriklik, qətiyyət, imkanların düzgün hesablanması və maraqların qorunması hadisəsidir. Təəssüf ki, bəzən bu keyfiyyətlərə malik olmayan liderlər dövlət başçısı olurlar və bundan sonra xalqların yaşadığı faciələrə şahidlik edirik. Hazırda Ukrayna məhz belə bir durumla qarşı-qarşıyadır.

Deputat qeyd edib ki, Rusiya-Ukrayna müharibəsi və Donbas məsələsi mürəkkəb konflikt olsa da, siyasi keçmişi və çətinliyi baxımından Azərbaycanın üzləşdiyi problem qədər dərin deyildi. Azərbaycan çox çətin şəraitdə öz gücünə güvənərək, demək olar ki, bütün dünya ilə mübarizə apararaq öz problemini həll etməyi bacardı. Babaoğlu vurğulayıb ki, bu uğur böyük liderlik, dərindən strateji siyasi düşüncə, yüksək diplomatik peşəkarlıq, qətiyyət və cəsarət tələb edən bir məsələ idi. Prezident İlham Əliyev məqsədyönlü, prinsipial və qətiyyətli siyasəti ilə bütün bu çətinliklərin öhdəsindən gəldi.

Hikmət Babaoğlu Azərbaycan liderinin dünya siyasətində yeni bir nümunə yaratdığına diqqət çəkir. Bu nümunə dünya siyasətində ciddiyə alınmayan kiçik dövlətlərin öz maraqlarını qoruya bilməsi bacarığını nümayiş etdirirdi. O, təəssüf edir ki, Ukrayna kimi böyük bir ölkə hal-hazırda həm uduzdurulur, həm də uduzur. Milli Məclisin üzvü alman filosof Corc Vilhelm Fridrix Hegelin dövlət anlayışı ilə bağlı fəlsəfəsini xatırladıb: "Dövlət öyrənmək üçün bir təcrübə məktəbidir." Babaoğlu əlavə edib ki, Ukrayna dövlətinin timsalında acı bir təcrübə ilə üzləşirik. Bu vəziyyət həm də dünyanın gələcəyi baxımından təəssüf doğurur, çünki XXI əsrdə bir ölkənin ərazisini işğal edib, bunu beynəlxalq hüquqa qəbul etdirmək mümkün görünür.

Bu, beynəlxalq hüququn başlıca prinsipinin pozulması deməkdir. Babaoğlu Qarabağ qələbəsini misal gətirərək vurğulayıb ki, Azərbaycan bununla həm də beynəlxalq hüquq prinsipinin pozulmasının qarşısını aldı. Azərbaycan həm ərazi bütövlüyünü, həm də suverenliyini bərpa etdi. Ukrayna təcrübəsində görünən isə odur ki, həm suverenlik, həm ərazi bütövlüyü, həm də beynəlxalq hüquq anlayışı heç bir dəyər ifadə etmir. Azərbaycanın qələbəsi regionda ədalətin bərpasının mümkünlüyünü sübut etdi.