Ukrayna hökuməti dövlət şirkətlərində audit yoxlamasına başlayıb

Ukrayna hökuməti bütün dövlət şirkətlərində audit yoxlamasına başlayıb. Bu addım korrupsiya ilə mübarizə və şəffaflığın artırılması məqsədi daşıyır. Ukrayna Prezidenti Volodimir Zelenski öz Telegram kanalında bu barədə ictimaiyyətə məlumat verib.

Zelenski bildirib ki, Baş nazir Yuliya Svırıdenko hökumətə hesabat təqdim edib və bu hesabatdan sonra hökumət dərhal bütün dövlət şirkətlərində yoxlama prosesinə start verib. Prezidentin sözlərinə görə, bu yoxlamanın yekun nəticələri hüquq-mühafizə orqanları və korrupsiyaya qarşı mübarizə qurumları ilə paylaşılacaq. O qeyd edib ki, hökumət bu orqanlara hərtərəfli dəstək verməlidir. "Məhz buna güvənirəm," deyə Zelenski videoda vurğulayıb.

Bu yoxlama daha əvvəl, noyabrın 13-də Ukrayna Nazirlər Kabinetinin rəhbəri tərəfindən elan edilmişdi. Audit xüsusilə energetika və müdafiə sənayesi sektorlarında fəaliyyət göstərən dövlət şirkətlərini əhatə edir. "Naftoqaz", "Ukroboronprom" və "Ukrzaliznitsa" (Ukrayna Dəmir Yolları) daxil olmaqla, böyük dövlət müəssisələri nəzarət altına alınır. Hökumət tələb edir ki, bu şirkətlərin müşahidə şuraları icra orqanlarının fəaliyyətinə yenidən baxmalı və hesabat verməlidir.