Uitkoff: Qəzzanın bərpası 50 milyard dollara başa gələ bilər

ABŞ Prezidentinin xüsusi elçisi Stiv Uitkoff Qəzza zolağının yenidən qurulması üçün tələb olunan maliyyə məbləğini açıqlayıb. O qeyd edib ki, iki illik münaqişə və ağır bombardmanlar nəticəsində yaranan dağıntıların aradan qaldırılması təxminən 50 milyard dollar tələb edə bilər.

Sky News-a istinadən verilən məlumata görə, S. Uitkoff bu rəqəmin dəqiq olmadığını, bəlkə bir az aşağı, bəlkə də bir qədər yuxarı ola biləcəyini bildirib. Buna baxmayaraq, o, bu məbləği Yaxın Şərq regionu üçün böyük bir yük saymır. Uitkoffun sözlərinə görə, bu xərc regional iqtisadiyyat üçün "o qədər də çox pul deyil".

Xüsusi elçi bərpa işlərini məhz kimin maliyyələşdirməli olduğunu dəqiqləşdirməyib. Lakin o, bu genişmiqyaslı tikinti prosesinin regionda sabitliyə doğru mühüm addım olacağını vurğulayıb. Qəzzada həyata keçiriləcək bu işlər zolaqda sülhün və normallaşmanın təmin edilməsi üçün əhəmiyyətli bir başlanğıc kimi görünür.