Ucarda fərdi yaşayış evi yanıb

Axşam saatlarında Ucar rayonunda fərdi yaşayış evində güclü yanğın hadisəsi qeydə alınıb. Hadisə rayonun Həsən bəy Zərdabi küçəsində baş verib. Yanğın 1964-cü il təvəllüdlü rayon sakini Kamil Əhməd oğlu Əhmədova məxsus mülkdə olub.

Məlumata görə, ümumi sahəsi 80 kvadrat metr olan yaşayış evi iki otaq, zal və mətbəxdən ibarət idi. Güclü yanğın nəticəsində evin bir hissəsi yanıb. Yanğınla mübarizə üçün hadisə yerinə dərhal Fövqəladə Hallar Nazirliyinin Ucar Rayon Yanğından Mühafizə Hissəsinin canlı qüvvəsi və xüsusi texnikası cəlb edilib.

Yanğınsöndürənlərin fəaliyyəti sayəsində alov qısa zamanda söndürülmüş, onun əhatə dairəsinin genişlənməsinin qarşısı alınıb. Təəssüf ki, hadisə zamanı evdə kirayə qalan şəxs zərər çəkib. Kirayənişin Şahnaz Əliyevanın halı pisləşdiyi üçün o, tibbi yardım məqsədilə xəstəxanaya aparılıb. Hazırda faktla bağlı müvafiq araşdırma aparılır.