U-23 Avropa çempionatı: İki boksçumuz 1/4 finala yüksəliblər

Macarıstanın paytaxtı Budapeştdə boks üzrə U-23 Avropa çempionatı davam edir. Yarışın ikinci günündə Azərbaycan millisinin daha iki boksçusu növbəti mərhələyə yüksəlməyi bacardı.

55 kiloqram çəki dərəcəsində mübarizə aparan Amin Məmmədzadə 1/8 finalda ispan Friha İsmail Maqraovi ilə qarşılaşdı. Boksçumuz rəqibini 5:0 hesabı ilə tamamilə məğlub edərək (30:26, 30:26, 30:26, 30:26, 30:25) 1/4 finala vəsiqə qazandı. O, növbəti döyüşünü Gürcüstan təmsilçisi Qor Ayvazyanla keçirəcək.

60 kiloqramda çıxış edən Tağı Nəsibov da ilk görüşündə qələbə qazanan idmançılar sırasındadır. Təmsilçimiz polşalı Yakub Krzpyeti 4:1 hesabı ilə üstələdi (29:28, 28:29, 29:28, 30:27, 29:28). Nəsibov yarımfinala gedən yolda irlandiyalı Qavin Ryanla rinqdə üz-üzə gələcək.

Tağı Nəsibov yarımfinal uğrunda döyüşə sabah çıxacaq. Amin Məmmədzadə isə noyabrın 26-da mübarizəyə davam edəcək. U-23 Avropa çempionatı noyabrın 29-da başa çatacaq.