Türkiyə Dəməşq aeroportuna hərbi məqsədlərlə radar sistemi qurulması iddialarını yalanlayıb

Rəsmi Ankara Türkiyənin Suriyanın Dəməşq Beynəlxalq Hava Limanına hərbi əməliyyatlar üçün radar sistemi quraşdırması barədə iddiaları rədd edib. Bu məlumat Türkiyə Prezident Administrasiyasının Dezinformasiya ilə Mübarizə Mərkəzi tərəfindən yayılıb. Yayılan spekulyasiyalar Türkiyənin mülki infrastrukturu hərbi məqsədlərlə istifadə etdiyini göstərsə də, rəsmi Ankara bu fərziyyələrin doğru olmadığını bildirir.

Mərkəz qeyd edib ki, sözügedən radar sistemi Suriya tərəfinin istəyi ilə yerləşdirilib. Bu aeroport mülki uçuşlar üçün istifadə edilir. Sistemin əsas məqsədi hava məkanına nəzarət imkanlarını və uçuş təhlükəsizliyini gücləndirməkdir. Bu quraşdırma tamamilə mülki aviasiyanın monitorinqi ilə bağlıdır.

Rəsmi məlumatda, həmçinin, ictimaiyyətə müraciət edilib. Bildirilib ki, ölkənin dost, qardaş və qonşu ölkələrlə əlaqələrini hədəf alan spekulyasiyalara etibar edilməməsi xahiş olunur.