Tranzit yüklərinin Azərbaycandan keçid müddətinin azaldılması məqsədilə görülən işlər açıqlanıb

“Azərbaycan Dəmir Yolları” QSC (ADY) ölkə ərazisindən keçən beynəlxalq nəqliyyat dəhlizləri üzrə yükdaşımaların daha sürətli və səmərəli olması üçün ardıcıl işlər görür. Qurum əsasən Şimal-Cənub və Şərq-Qərb dəhlizlərindəki əməliyyatların sürətini artırmağa və mövcud çətinlikləri aradan qaldırmağa çalışır. Bu məqsədlə tərəfdaşlarla görüşlər keçirilir, razılaşmalar əldə edilir, eyni zamanda, infrastrukturun yenidən qurulması istiqamətində ciddi fəaliyyət aparılır. Bu tədbirlər Azərbaycandan keçən tranzit yüklərinin daşınma müddətini əhəmiyyətli dərəcədə qısaltmağa kömək edəcək.

ADY-dən verilən məlumata görə, hazırda Şimal-Cənub dəhlizinin Azərbaycan hissəsində mühüm layihələr icra edilir. Sumqayıt-Yalama dəmir yolu xəttinin layihələndirilməsi işləri artıq tamamlanıb. Bu xəttin birinci və ikinci hissəsi üzrə tikinti-quraşdırma işlərinin 96 faizi başa çatıb. Bundan əlavə, Şimal-Cənub dəhlizinin digər bir vacib hissəsi olan Ələt-Osmanlı-Astara dəmir yolu xəttinin yenidən qurulmasına 2024-cü ildən başlanılıb. Bu layihənin 2028-ci ilə qədər tamamlanması planlaşdırılır. Hazırda bu xəttin layihələndirilməsinin 55%-i, Ələt-Osmanlı hissəsi üzrə tikinti-quraşdırma işlərinin isə 37%-i yerinə yetirilib.

Daha bir mühüm yenilənmə Bakı-Böyük Kəsik magistral dəmir yolu xəttində aparılıb. ADY tranzit yüklərinin daşındığı bu əsas magistral xətdə enerji sistemini modernləşdirməyi bitirib. Ucar-Hacıqabul sahəsində (122 km) dəyişən cərəyan (AC) sistemi tətbiq edilib və keçid tam təmin olunub. Dəyişən cərəyan sisteminə keçid elektriklə işləyən lokomotivlərin dartı gücünü yaxşılaşdıracaq. Bu, həm daşınan yük həcminin artırılmasına, həm də qatarların hərəkət sürətinin yüksəlməsinə gətirib çıxaracaq. Bütün bu yenilənmələr, xüsusilə də Orta Dəhliz üzrə yükdaşımaların əməliyyat səmərəliliyini xeyli artırmağa imkan verəcək.

Beynəlxalq əməkdaşlıq çərçivəsində də əhəmiyyətli addımlar atılıb. Bu yaxınlarda Qazaxıstan Nəqliyyat Həftəsi zamanı Azərbaycan, Qazaxıstan və Gürcüstan dəmiryol administrasiyalarının rəhbərləri Rövşən Rüstəmov, Talqat Aldıbergenov və Laşa Abaşidze Trans-Xəzər Beynəlxalq Nəqliyyat Marşrutu (Orta Dəhliz) boyunca mövcud çətinlikləri aradan qaldırmağa dair Yol Xəritəsini imzalayıblar. Sənəddə infrastrukturu yaxşılaşdırmaq, hərəkət tərkiblərini yeniləmək, əməliyyat prosedurlarını təkmilləşdirmək prioritet istiqamətlər kimi göstərilib. Eyni zamanda, artan yük həcmlərinə hazır olmaq üçün üç ölkə arasında koordinasiyanın gücləndirilməsi də bu planın əsas məqsədlərindəndir.