Tramp Lula da Silva ilə ABŞ-nin Braziliyaya tətbiq etdiyi tarifləri müzakirə edib

ABŞ prezidenti Donald Tramp və braziliyalı həmkarı Luis İnasiu Lula da Silva telefon vasitəsilə danışaraq ABŞ-nin Braziliya mallarına tətbiq etdiyi gömrük rüsumları məsələsini müzakirə ediblər. Ağ Evdə jurnalistlərə açıqlama verən amerikalı lider, danışığın çox müsbət keçdiyini bildirib. Donald Tramp qeyd edib ki, onlar ticarət və sanksiyalar haqqında söhbət ediblər.

Tramp deyib: "Bəli, gözəl söhbətimiz oldu. Ticarətdən, sanksiyalardan danışdıq. Çünki bildiyiniz kimi, mən baş verən müəyyən hadisələrlə bağlı sanksiyalar tətbiq etmişəm. Amma çox gözəl söhbətimiz oldu. Mən bundan həzz aldım." Bu telefon danışığı barədə Braziliya tərəfi çərşənbə axşamı günü ətraflı məlumat yayımlayıb.

Braziliya rəhbərinin mətbuat xidməti bildirib ki, Luis İnasiu Lula da Silva ABŞ-nin bəzi Braziliya məhsullarına əlavə 40 faizlik gömrük rüsumunu ləğv etmək qərarını müsbət addım kimi qiymətləndirib. Rüsumu ləğv edilən məhsullar arasında ət, qəhvə və meyvə kimi mallar var idi. Bununla yanaşı, Lula da Silva vurğulayıb ki, ölkələr rüsumlara tabe olan digər malları da müzakirə etməlidir. Braziliya bu məsələ ilə bağlı danışıqlara mümkün qədər tez başlamağa sadiqdir.