Tramp Ali Məhkəmədə dinləmələrdə iştirak edən ilk ABŞ prezidenti ola bilər

ABŞ Prezidenti Donald Trampın tariflərlə bağlı Ali Məhkəmədə keçiriləcək dinləmələrdə iştirak etmək niyyəti, ölkə tarixində misli görünməmiş hadisəyə səbəb ola bilər. Əgər Tramp həqiqətən də dinləmələrdə iştirak edərsə, Ali Məhkəmənin şifahi müzakirələrinə qatılan ilk dövlət başçısı olacaq. “Bloomberg” agentliyi bu barədə xəbər yayıb. Prezident Tramp əvvəlki dövrdə tətbiq etdiyi idxal tariflərinin taleyini müəyyən edəcək dinləmələrdə şəxsən iştirak etmək niyyətində olduğunu bildirib. Bu addım ABŞ-da böyük maraqla qarşılanır, çünki Ali Məhkəmə Tarix Cəmiyyətinin məlumatına görə, məhkəmənin iki əsrdən artıq tarixində indiyədək heç bir prezident belə bir müzakirədə yer almayıb.

Ali Məhkəmə ABŞ administrasiyası tərəfindən tətbiq edilən çoxsaylı tariflərin qanuniliyini araşdırmaq məqsədilə noyabrın 5-nə dinləmə təyin edib. Bu iş bir qrup biznesmenin hökumətə qarşı qaldırdığı iddiadan sonra başlanıb. İş adamları tariflərin qanunsuz tətbiq edildiyini və şirkətlərinə zərər vurduğunu iddia edirlər. Avqustun 29-da ABŞ Dairə Apellyasiya Məhkəməsi Trampın bəzi tarifləri tətbiq etmək səlahiyyətinin olmadığını qərara almışdı. Buna cavab olaraq, sentyabrın 4-də Tramp administrasiyası bu qərarın ləğvi üçün Ali Məhkəməyə müraciət edib. Agentlik bildirir ki, Trampın dinləmədə iştirakı administrasiyaya məhkəməyə dolayı təzyiq imkanı verə bilər. Bu təzyiq tariflərin qanunsuz hesab olunması barədə qərarın ləğv edilməsi üçün hesablanıb.

Bununla belə, Prezidentin dinləmədə iştirakının baş tutub-tutmayacağı hələ də qeyri-müəyyəndir. Həmin gün Trampın Florida ştatının Mayami şəhərində keçiriləcək biznes forumunda çıxış etməsi planlaşdırılır. Ali Məhkəmə Tarix Cəmiyyətinin nəşrlər üzrə direktoru Kler Kuşmanın dediyinə görə, Trampın qatılması tarixdə ilk prezident hadisəsi olacaq. Bu hadisə sadəcə hüquqi deyil, həm də siyasi baxımdan böyük əhəmiyyət daşıyır, çünki bu, prezidentin məhkəmə proseslərində şəxsi iştirakı ilə bağlı yeni bir presedent yarada bilər.