Tramp: Demokratlar tezliklə şatdaun əleyhinə tədbirləri dəstəkləyəcəklər

ABŞ Prezidenti Donald Tramp Konqresdəki Demokratların tezliklə fəaliyyətini qismən dayandırmış federal hökumətin işini bərpa etmək üçün təklif edilən tədbirləri dəstəkləyəcəyinə inanır. Amerika lideri bu proqnozunu Ağ Evin Şərq zalında tələbələrdən ibarət iki beysbol komandasını qəbul edərkən bildirdi.

Tramp ümid edir ki, Demokratlar "o qədər də anormal olmayacaqlar" və tərəflər hökumətin yenidən maliyyələşdirilməsi haqqında qanun layihəsinə tezliklə səs verə biləcəklər. Prezident ən önəmli siyasi rəqiblərinin də artıq ölkə üçün düzgün addım atmağın zəruriliyini düşünməyə başladıqlarını eşitdiyini deyib. O, siyasi dalana baxmayaraq, tərəflərin razılığa gələcəyinə inam ifadə edir.

ABŞ federal hökumətinin maliyyə çatışmazlığı ucbatından qismən dayanması oktyabrın 1-də gecə yarısı başlamışdı. Bu vəziyyət Konqresdəki hakim Respublikaçılar və müxalif Demokratlar Partiyasının nümayəndələrinin səhiyyə də daxil olmaqla bir sıra xərc maddələri üzrə razılığa gələ bilməməsi nəticəsində yaranıb. Tərəflər hələ də anlaşa bilmirlər. Həm Demokratlar, həm də Respublikaçılar bir-birlərini şatdauna təhrikdə və vəziyyəti siyasi məqsədlər üçün uzatmaqda ittiham edirlər. ABŞ hökumətinin fəaliyyətini bərpa etmək üçün növbəti qanun layihəsinin qəbulu əsas müzakirə mövzusu olaraq qalır.