Teymur Musayev Latviyanın tibb müəssisələri və universitetlərinin fəaliyyəti ilə tanış olub (FOTO)

Azərbaycan Respublikasının səhiyyə naziri Teymur Musayevin rəhbərlik etdiyi nümayəndə heyəti Latviyanın paytaxtı Riqa şəhərində rəsmi səfərdə olub. Bu səfərin əsas məqsədi Latviyanın aparıcı tibb müəssisələri, elmi-tədqiqat mərkəzləri və ali təhsil ocaqlarının fəaliyyəti ilə yaxından tanış olmaqdır. Səhiyyə Nazirliyindən verilən məlumata görə, bu tədbirlər çərçivəsində iki ölkə arasında səhiyyə və tibbi təhsil sahəsində gələcək əməkdaşlıq yolları müzakirə edilib.

Nümayəndə heyəti Riqa Beynəlxalq İqtisadiyyat və Biznes İdarəçiliyi Məktəbinin (RISEBA) rəhbərliyi ilə görüşüb. Qonaqlara məlumat verildi ki, 1992-ci ildə yaradılan RISEBA, Latviyanın ən böyük özəl ali təhsil müəssisələrindən biridir. RISEBA dünyanın müxtəlif universitetləri və təşkilatları ilə fəal əməkdaşlıq edir. Bu əməkdaşlıq sayəsində məktəb tələbələrə peşəkar məqsədlərinə uyğun istiqamət seçməyə imkan verən fərqli təhsil proqramlarını təklif edir. Eyni zamanda, Riqa Stradinş Universitetinin Tibb Təhsil Texnologiyaları Mərkəzi və Latviya Universitetinin Tibb və Həyat Elmləri fakültəsində görüşlər keçirildi. Burada tibbi təhsilin modernləşdirilməsi və simulyasiya mərkəzlərində birgə təlimlər barədə fikir mübadiləsi aparılıb.

Səfər zamanı nümayəndə heyəti bir sıra tibb müəssisələrinin fəaliyyəti ilə tanış olub. Riqa Şərq Universitet Xəstəxanasının Təcili yardım və pasiyent qəbulu klinikasına, eləcə də Travmatologiya və Ortopediya Xəstəxanasına baxış keçirilib. Bu xəstəxanalarda infrastruktur, yeni tibbi texnologiyaların tətbiqi və travmatologiya, ortopediya, təcili yardım xidmətləri üzrə təcrübə mübadiləsi imkanları müzakirə edilib. Həmçinin Uşaq Klinik Universitet Xəstəxanasında görüş keçirilərək pediatriya sahəsində elmi və klinik əməkdaşlıq məsələləri müzakirəyə çıxarılıb. Bu görüşlər klinik təcrübənin artırılması üçün şərait yaradıb.

Nümayəndə heyəti həm də Latviyanın aparıcı əczaçılıq şirkəti olan “Grindeks” əczaçılıq şirkətinin fəaliyyəti ilə tanış olub. Farmasevtik istehsal prosesi, keyfiyyətə nəzarət mexanizmləri, dərman təhlükəsizliyi və yeni preparatların hazırlanması sahəsində əməkdaşlıq perspektivləri qiymətləndirilib. Səfər E. Qulbis laboratoriyasında Latviya Tibb İşəgötürənləri Assosiasiyası (VADDA) ilə görüşlə başa çatıb. Bu görüşdə laborator xidmətlərin təşkili, diaqnostik imkanların genişləndirilməsi, habelə müasir laboratoriya standartlarının tətbiqi üzrə əməkdaşlıq məsələləri müzakirə edilib. Ümumilikdə, bu səfər Azərbaycan və Latviya arasında tibb elmi, klinik təcrübə və səhiyyə xidmətləri sahəsində əməkdaşlığın genişləndirilməsi üçün böyük əhəmiyyət daşıyır.