Sudanda doğum evinə hücum nəticəsində 460-dan çox insan qətlə yetirilib

Sudanda "Çevik Dəstək Qüvvələri" (RSF) silahlılarının törətdiyi dəhşətli hücum nəticəsində bir doğum evində 460-dan çox insan qətlə yetirilib. Silahlı qruplaşma xəstəxanaya soxularaq oradakı bütün həkimləri və xəstələri öldürüb. Bu hadisə ölkədə davam edən vətəndaş müharibəsinin və mülki şəxslərə qarşı zorakılığın miqyasını göstərir.

Bu faciə Əl-Fəşər şəhərində yerləşən “Səudiyyə Doğum Evi”ndə baş verib. Hadisə haqqında "Bild" nəşri məlumat yayıb. Məlumatlara görə, bu cür hərəkətlər RSF tərəfindən bölgədə törədilən cinayətlərin yalnız bir hissəsidir. Xəstəxanalar beynəlxalq humanitar hüquqa görə qorunmalı olsa da, Sudandakı qruplaşmalar bu qaydalara məhəl qoymurlar.

RSF qüvvələrinin oktyabrın 25-26-da Əl-Fəşəri ələ keçirməsindən sonra şəhərdə vəziyyət daha da kritikləşib. Bildirilir ki, qruplaşma şəhəri nəzarətə götürdükdən sonra azı 1 500 silahsız mülki şəxsi qətlə yetirib. Doğum evinə edilən bu qəddar hücum isə RSF-in mülki əhaliyə qarşı yönəlmiş zorakılığının sonuncu, lakin ən sarsıdıcı nümunələrindən biridir.