"Spiegel": Almaniya Şimali İraqdakı hərbi kontingentini azaldır

Almaniya Silahlı Qüvvələri (Bundesver) təhlükəsizlik mülahizələrini əsas gətirərək Şimali İraqdakı alman kontingentinin sayını xeyli azaldır. Bu barədə "Der Spiegel" jurnalı məlumat yayıb.

Nəşr bildirir ki, Bundesverin operativ komandanlığı bu addımı İrandakı gərginliyin artması təhlükəsinə cavab olaraq atır. Ehtiyat tədbiri kimi, missiyanın icrası üçün iştirakı zəruri sayılmayan personal İraqdan çıxarılıb. Lakin Bundesver nümayəndəsi bu prosesdə cəlb olunan qüvvələrin sayı və ya geri çəkilmədən sonra qalan kontingentin miqdarı barədə şərh verməkdən imtina etdi.

Bundestaq üçün nəzərdə tutulmuş rəsmi bildirişdə bu təhlükəsizlik tədbiri ABŞ və İran arasındakı gərginliyin daha da yüksəlməsi ilə əsaslandırılır. "Der Spiegel" vurğuladı ki, hələ yanvarın sonunda İranla hərbi toqquşma təhlükəsinin artması səbəbindən Şimali İraq üçün təhlükə səviyyəsi artırılmışdı. Mövcud vəziyyət haqqında hesabatda qeyd olunub ki, Almaniya qüvvələri ABŞ qoşunları ilə bazaları birgə istifadə etdiyi üçün Bundesver üçün "dolayı təhdid" yaranmışdı.

Almaniya hökuməti bu missiyaya 2015-ci ildə, İŞİD terror qruplaşması Suriyanın böyük hissəsini və İraqın bəzi rayonlarını nəzarətə götürəndə başlamışdı. Bu proqram çərçivəsində Bundesver qruplaşma ilə mübarizə aparmaq üçün İraqın təhlükəsizlik qüvvələrinə təlimlər keçirirdi, əsas diqqət rəhbər hərbi heyətə verilirdi.

Son dövrlərdə Bundesverin İraq və İordaniyadakı missiya çərçivəsindəki kontingentinin sayı təxminən 300 hərbçi təşkil edirdi. Ancaq onların böyük hissəsi İordaniyadakı baza ərazisində yerləşir. Almaniya Hərbi Hava Qüvvələri uzun illərdir ki, orada səhra düşərgəsindən istifadə edir. Onlar yanacaqdolduran təyyarələrlə beynəlxalq antiterror koalisiyasına dəstək verir.