ŞKTR-də keçirilən prezident seçkilərinin yekun nəticələri açıqlanıb

Şimali Kipr Türk Respublikasında (ŞKTR) oktyabrın 19-da keçirilən prezident seçkilərinin yekun nəticələri açıqlanıb. Ölkənin Ali Seçki Şurasının məlumatına görə, Cümhuriyyətçi Türk Partiyasının sədri Tufan Erhürman seçkilərdə inamlı qələbə qazanaraq yeni prezident seçilib. Bütün 777 seçki qutusunun nəticələri əsasında, Erhürman seçicilərin 62,76 faizinin səsini alıb. Bu, 87 137 səs deməkdir. Tufan Erhürmanın bu nəticəsi onun böyük fərqlə qələbəsini təsdiqləyir.

Seçkilərdə müstəqil namizəd kimi iştirak edən hazırkı prezident Ersin Tatar 35,76 faiz dəstək toplaya bilib. O, ümumilikdə 49 650 səs əldə edib. Seçkilərdə vətəndaşların aktivliyi yüksək idi. Ölkə üzrə seçici fəallığı 64,82 faiz təşkil edib. Səsvermə hüququna sahib olan 218 313 nəfərdən 138 839 nəfəri demokratik haqqından istifadə edərək seçkilərdə iştirak edib.

Nəticələrin elanından sonra Türkiyədən fərqli siyasi reaksiyalar gəlib. Türkiyə Prezidenti Rəcəb Tayyib Ərdoğan ölkənin yeni prezidentini təbrik edib. Türkiyə Xarici İşlər Nazirliyi isə yaydığı bəyanatda bu seçkilərin ŞKTR-dəki dövlət ənənəsini və demokratiya mədəniyyətini əks etdirdiyini bildirib. Lakin Türkiyənin Milliyyətçi Hərəkat Partiyasının (MHP) sədri Dövlət Bağçalı fərqli bir çağırış edib. Bağçalı ŞKTR parlamentini təcili iclas keçirməyə çağıraraq, deputatların ŞKTR-in Türkiyəyə birləşməsi barədə qərar verməli olduğunu açıqlayıb.