Səkidə sərnişin mikroavtobusu ağaca çırpılıb, xəsarət alan var

Şəki rayonunda ağır yol qəzası baş verib. Sərnişin daşıyan bir mikroavtobus yoldan çıxaraq ağaca çırpılıb, nəticədə sürücü xəsarət alıb. Hadisə Şəki-Baş Zəyzid avtomobil yolunun Orta Zəyzid kəndi ərazisindən keçən hissəsində qeydə alınıb.

Qəza 35 yaşlı rayon sakini Famil Məmmədovun idarə etdiyi "Mercedes" markalı sərnişin mikroavtobusu ilə baş verib. Məlumata görə, sürücü idarəetməni itirib və maşın yolun kənarındakı ağaca çırpılıb. Qəza zamanı Famil Məmmədov müxtəlif dərəcəli bədən xəsarətləri alıb. O, mikroavtobusun sükan arxasında sıxılmış vəziyyətdə qalıb.

Sürücünü xilas etmək üçün əraziyə dərhal Şəki rayon Dövlət Yanğından Mühafizə Hissəsinin yanğınsöndürənləri və xilasediciləri cəlb edilib. Xilasetmə əməliyyatından sonra sürücü xilas edilərək həkim briqadasına təhvil verilib. Yaralı dərhal Şəki xəstəxanasına yerləşdirilib. Əlavə məlumata görə, qəza anında mikroavtobusda heç bir sərnişin olmayıb. Faktla bağlı hazırda müvafiq araşdırma aparılır.