Şəkidə baş verən ağır qəzada 6 nəfərin ağır yaralanıb, sürücünün kimliyi məlum olub - VİDEO - YENİLƏNİB-1

Şəki rayonunda baş verən ağır yol qəzası nəticəsində altı nəfər müxtəlif dərəcəli bədən xəsarətləri alıb. Hadisə Şəki–Qax avtomobil yolunun İncə kəndi ərazisindən keçən hissəsində, axşam saat 19:00 radələrində iki minik avtomobilinin toqquşması ilə qeydə alınıb. İlkin məlumatlar yaralılardan iki nəfərin avtomobillərin içərisində sıxılmış vəziyyətdə qaldığını göstərirdi. Yaralıların çıxarılması və onlara tibbi yardım göstərilməsi üçün hadisə yerinə Şəki rayon Dövlət Yanğından Mühafizə Hissəsinin xilasediciləri, polis əməkdaşları və həkim briqadası göndərildi. Qəza nəticəsində xəstəxanaya yerləşdirilən şəxslərin vəziyyəti ağır qiymətləndirilir.

Qəzada iştirak edən avtomobillərin və sürücülərin kimliyi müəyyənləşib. Qəza zamanı 2003-cü il təvəllüdlü Sevindir Yamən oğlu Abdurahmanovun idarə etdiyi “Mercedes E-220” markalı avtomobil (04-BM-692) ilə 1994-cü il təvəllüdlü Pərviz Bəşarət oğlu Allahverdiyevin idarə etdiyi “Chevrolet Cruze” markalı avtomobil (55-CC-770) toqquşub. Hadisə nəticəsində xəsarət alan “Mercedes”in sürücüsü S. Abdurahmanov avtomobildə sükan arxasında sıxılmışdı. Şəki Rayon Dövlət Yanğından Mühafizə Hissəsinin yanğınsöndürən-xilasediciləri onu xüsusi qəza-xilasetmə alətləri vasitəsilə çıxarmağa nail oldular. Sürücü daha sonra tibbi yardım almaq üçün Respublika Təcili və Təxirəsalınmaz Tibbi Yardım Mərkəzinin Şəki rayon şöbəsinin həkimlərinə təhvil verildi.

Qəza səbəbilə 09.11.2025-ci il tarixində saat 20:00 radələrində ümumilikdə altı nəfər, o cümlədən dörd kişi və iki qadın, Şəki Rayon Mərkəzi Xəstəxanasının Təcili Tibbi Yardım şöbəsinə hospitalizasiya edilib. Müxtəlif bədən xəsarətləri alan bu şəxslərə zəruri tibbi xidmətlər göstərilir. Onların müayinəsi və müalicəsi hazırda Təcili Tibbi Yardım şöbəsində davam edir, lakin vəziyyətləri ağır olaraq qalır. Bu yol-nəqliyyat hadisəsi faktı ilə bağlı müvafiq qurumlar tərəfindən təhqiqat aparılır.