Şəkidə 300-ə yaxın ilk təşkilat sədrləri bir araya gəldi (FOTO)

AHİK-in üzv təşkilatı olan Elm və Təhsil İşçiləri Həmkarlar İttifaqı (ETİHİ) Respublika Komitəsi üzv təşkilatlarla birbaşa ünsiyyətin və əməkdaşlıq mühitinin möhkəmləndirilməsi üçün ardıcıl tədbirlərini davam etdirir. Bu fəaliyyətlər çərçivəsində növbəti regional görüş noyabrın 20-də Şəki şəhər Heydər Əliyev Mərkəzində baş tutdu. Görüşə Şəki şəhəri, Oğuz və Balakən rayonlarının təhsil müəssisələrində fəaliyyət göstərən ilk həmkarlar ittifaqı təşkilatlarının sədrləri qatılmışdı. Təxminən 300 nəfər iştirakçının iştirak etdiyi tədbirdə ETİHİ Respublika Komitəsinin rəhbərliyi, o cümlədən sədr Araz Paşayev, sədr müavini Mirzə Cəfərzadə və Komitənin məsul əməkdaşları iştirak etdilər.

Komitə sədri Araz Paşayev öz çıxışında AHİK-in sosial tərəfdaşlıq siyasətinə uyğun olaraq əmək münasibətlərinin tənzimlənməsi prosesində həmkarlar ittifaqlarının strateji yerini diqqətə çatdırdı. O, üzv təşkilatlar arasında həmrəyliyin və vahid fəaliyyət xəttinin əsas hədəf olduğunu qeyd etdi. Araz Paşayev bildirdi ki, birbaşa dialoqun genişləndirilməsi və ilk təşkilatlara sistemli dəstəyin artırılması Komitənin başlıca iş istiqamətlərindəndir. Bu görüşlərdə məqsəd regionlardakı təşkilatlarla əlaqələri gücləndirməkdir. Sədr vurğuladı ki, həmrəyliyin və vahid fəaliyyətin təmin olunması təşkilatın gələcək uğurları üçün böyük əhəmiyyətə malikdir.

Tədbir zamanı sosial müdafiə, maarifləndirmə, əmək münasibətləri və işçi hüquqlarının təminatı üzrə görülən işlərlə bağlı təqdimatlar edildi. Görüş ilk təşkilat sədrləri ilə sual-cavab formatında davam etdirildi. Bu format səmərəli fikir mübadiləsinə şərait yaratdı, səsləndirilən bütün rəy və təkliflər Komitə tərəfindən qeydə alındı. ETİHİ rəhbərliyi regional görüşlərin digər bölgələrdə də davam edəcəyini bildirdi. Üzv təşkilatlarla qarşılıqlı fəaliyyətin gücləndirilməsi Komitənin əsas prioritet məsələsi olaraq qalır. Hazırda Elm və Təhsil İşçiləri Həmkarlar İttifaqı Respublika Komitəsi ölkə üzrə 405 mindən çox ittifaq üzvünü, təxminən 6 min ilk təşkilatı və 147 üzv təşkilatı birləşdirir.