Şahmatcımız Avropa çempionu olub

Monteneqronun Budva şəhərində yeniyetmələr arasında şahmat üzrə keçirilən Avropa çempionatı yekunlaşdı. 48 ölkədən cəmi 1169 şahmatçının iştirak etdiyi bu mötəbər qitə birinciliyində Azərbaycan yığması 3 medal qazanmağı bacardı. Ən böyük uğura 14 yaşlı oğlanların kateqoriyasında çıxış edən təmsilçimiz Xaqan Əhməd imza atdı. O, doqquz tur ərzində 7,5 xal toplayaraq birinci yeri tutdu.

Xaqan Əhməd yarışın gedişində güclü rəqiblərlə mübarizə apardı. Doqquz tur başa çatdıqdan sonra iki şahmatçının xalları eyniləşdi. Lakin əlavə əmsallara görə, Əhməd yarışın 6-cı turunda məğlub etdiyi Ermənistan şahmatçısı Tiqran Ambarçumanyanı geridə qoydu. Beləliklə, o, 116 şahmatçı arasında birinci yerə layiq görüldü və Avropa çempionu titulunu qazandı.

Qızlar arasında da Azərbaycan medallara sahib çıxdı. 10 yaşlı qızların yarışında Mehriban Əhmədli 9 turda 7,5 xal toplayaraq gümüş medala sahib oldu. 16 yaşlı qızların birinciliyində isə Məryəm Ağaverdiyeva 9 partiyada 7 xalla bürünc medal qazandı. Komanda digər nailiyyətlərə də imza atdı. 16 yaşlı oğlanların mübarizəsində Rüstəm Rüstəmov, 8 yaşlı oğlanların yarışında isə Kənan Babasoy yekunda 2-5-ci sıraları bölüşərək ilk beşlikdə yer aldılar.

Azərbaycan komandası ümumilikdə 1 qızıl, 1 gümüş və 1 bürünc medal qazanaraq 48 ölkə arasında komanda hesabında 5-ci oldu. Yarışın bağlanış mərasimində bütün qalib və mükafatçılara medal, kubok və diplomlar təqdim edildi. Ən vacib anlardan biri isə 14 yaşlı oğlanların kateqoriyasında qızıl medal qazanan Xaqan Əhmədin şərəfinə Monteneqroda Azərbaycanın Dövlət Himninin səsləndirilməsi oldu.