S&P Azərbaycanın bank islahatlarını qiymətləndirib

Beynəlxalq reytinq agentliyi "S&P Global Ratings" Azərbaycanın bank sektorunda apardığı islahatları qiymətləndirib. Agentliyin proqnozuna görə, depozitlərin dollarlaşma səviyyəsinin kreditlərin dollarlaşmasından xeyli yüksək qalması mühüm bir problem olaraq qalır. Bu vəziyyət valyuta öhdəlikləri ilə əsasən manatla formalaşan aktivlər arasında struktur valyuta disbalansına gətirib çıxarır.

Bununla belə, Azərbaycan hökuməti prudensial tənzimləmə və bank nəzarətini gücləndirməyə yönəlmiş 2024-2026-cı illər üçün Maliyyə Sektorunun İnkişaf Strategiyası çərçivəsində islahatlara başlayıb. Bu çərçivədə "Bazel III" standartları mərhələli şəkildə tətbiq olunmağa davam edir. Həmçinin, idarəetmənin təkmilləşdirilməsi, məlumatların açıqlanması və makroprudensial nəzarət üzrə təşəbbüslər həyata keçirilir. Riskəsaslı nəzarət sisteminin pilot tətbiqi də bu yeniliklər arasındadır. İslahatlar hələ başlanğıc mərhələsində olsa da, onların tam icrası beynəlxalq tənzimləmə təcrübəsi ilə mövcud fərqin azalmasına kömək etməlidir. Qeyd etmək lazımdır ki, bank sektoru artan depozit bazası sayəsində sabit maliyyələşdirmə profilini qoruyur.

"S&P" analitikləri depozitlərin dollarlaşma göstəricisinin ciddi şəkildə azaldığını bildirir. Bu göstərici COVID-19 pandemiyasından əvvəlki 55%-dən 29%-ə enib. Bu azalmaya manat depozitləri üzrə təklif olunan daha yüksək faiz dərəcələri və məzənnənin uzun müddətli sabitliyi dəstək verib. Bununla belə, agentlik bu göstəricinin etimad amilinə qarşı son dərəcə həssas olması ilə bağlı xəbərdarlıq edir. Hesabatda deyilir ki, valyuta məzənnəsinə təzyiq yenidən artacağı təqdirdə, əmanətçilərin xarici valyutaya sürətli dönüşü mümkün ola bilər.