"S&P" Azərbaycanın 2025-2028-ci illər üzrə ÜDM ilə bağlı proqnozunu təqdim edib

“S&P Global Ratings” agentliyi Azərbaycan iqtisadiyyatına dair proqnozlarını təqdim edib. Agentliyin hesablamalarına görə, 2025-2028-ci illəri əhatə edən növbəti dörd il ərzində ölkədə həm nominal, həm də adambaşına düşən Ümumi Daxili Məhsulda (ÜDM) dayanıqlı artımın olacağı gözlənilir. Bu proqnozlar ölkə iqtisadiyyatının uzunmüddətli sabitlik yolunda olduğunu göstərir.

“S&P”nin proqnozuna görə, Azərbaycanın nominal ÜDM-i 2025-ci ildə 76,7 milyard ABŞ dollarından 2028-ci ildə 89,6 milyard dollara qalxacaq. Müqayisə üçün qeyd edək ki, 2024-cü il üzrə nominal ÜDM 74,3 milyard dollar səviyyəsində idi. Adambaşına düşən ÜDM göstəricilərində də oxşar yüksəliş gözlənilir. Bu göstərici 2024-cü ildə 7 300 dollar təşkil etmişdi, lakin 2025-ci ildə 7 500 dollara, 2028-ci ildə isə 8 600 dollara çatacağı ehtimal edilir. Bu rəqəmlər ölkə sakinlərinin rifah səviyyəsinin tədricən yüksəlməsini göstərir.

Buna baxmayaraq, Real ÜDM-in artım tempində 2024-cü illə müqayisədə müəyyən zəifləmə gözlənilir. 2024-cü ildə 4,1% təşkil edən bu göstəricinin 2025-ci ildə 1,8%-ə düşməsi proqnozlaşdırılır. Sonrakı illərdə isə artım tempi nisbətən sabit qalacaq: 2026-cı ildə 1,7%, 2027-ci ildə 2%, 2028-ci ildə isə 2,1% artım gözlənilir. Bu zəifləmənin əsas səbəbi kimi neft-qaz sektorundakı fəallığın mənfi qalması göstərilir. Hesabat dövrünün ikinci yarısında iqtisadi fəallıq 1,5% artsa da, ilin yekununda real ÜDM artımının zəifləməsi gözlənilir.

Agentliyin hesabatında neft və qaz hasilatına aid xüsusi detallar yer alıb. İlin ilk on ayında neft hasilatı 4,6% azalıb, təxminən gündəlik 556 000 barrel səviyyəsinə düşüb. Bu, ötən ilin müvafiq dövrü ilə müqayisədə gündəlik təxminən 27 000 barrel azdır. Təbii qaz hasilatında isə cüzi artım qeydə alınıb; hasilat 1,7% artaraq gündəlik 849 000 barrel neft ekvivalenti səviyyəsinə çatıb. Bu artım cəmi 14 000 barrel (neft ekvivalentində) təşkil edib. Agentlik qeyd edir ki, qaz hasilatındakı yüngül artım neft hasilatındakı kəskin azalmanı tam kompensasiya edə bilməyib. Nəticədə neft-qaz sektorundakı ümumi fəallıq mənfi olaraq qalır, bu da ilk növbədə real iqtisadi artıma təsir göstərir.