Rüşvət almaqda təqsirləndirilən hərbi komissar və işçilərinə hökm oxunub

Bakı Hərbi Məhkəməsində Səfərbərlik və Hərbi Xidmətə Çağırış üzrə Dövlət Xidməti Xəzər rayon idarəsinin rəisi Ramin Şükürov və onun iki işçisi haqqında hökm çıxarılıb. Bu şəxslər rüşvət almaqda ittiham olunurdu. Məhkəmə prosesində rəis Ramin Şükürovdan başqa, Çağırış şöbəsinin baş zabiti Xalid Əzimov və zabiti Emil Nəbiyev də mühakimə olunurdu. Proses hakim Fikrət Əliyevin sədrliyi ilə keçirildi. Təqsirləndirilən şəxslər dövlət orqanlarında xidmətlə bağlı təkrarən külli miqdarda rüşvət almaq və nüfuz alveri maddələri ilə ittiham edilirdi. Baxmayaraq ki, prokurorluq tərəfi ağır həbs cəzası tələb etmişdi, məhkəmə onlara şərti cəza tətbiq etmək qərarına gəldi.

Prokuror məhkəmə çıxışı zamanı Ramin Şükürovun 10 il, Xalid Əzimovun 9 il, Emil Nəbiyevin isə 8 il müddətinə azadlıqdan məhrum edilməsini istəmişdi. O, həmçinin hər üç təqsirləndirilən şəxsin birbaşa məhkəmə zalından həbs olunmasını təklif etdi. Lakin, təqsirləndirilən şəxslər və onların vəkilləri verilən ittihamları qəbul etmədilər. Onlar məhkəmədən özləri barədə bəraət hökmü çıxarılmasını tələb edirdilər. Proses başlamazdan əvvəl Ramin Şükürov barəsində seçilmiş həbs qətimkan tədbiri dəyişdirilmiş və o, ev dustaqlığına buraxılmışdı. Digər iki şəxs - Emil Nəbiyev və Xalid Əzimov da ev dustaqlığı şəraitində saxlanılırdı.

Məhkəmə elan etdiyi hökmə əsasən, təqsirləndirilən şəxslərə şərti cəzalar verildi. Ramin Şükürova 4 il sınaq müddəti seçilməklə 10 il, Xalid Əzimova 2 il 6 ay sınaq müddəti ilə 9 il, Emil Nəbiyevə isə 3 il sınaq müddəti seçilməklə 8 il şərti cəza verildi. Hər üç təqsirləndirilən şəxs əlavə olaraq müəyyən müddət ərzində dövlət və yerli özünü idarəetmə orqanlarında rəhbər və maddi-məsul vəzifə tutmaq hüququndan məhrum ediliblər. Şükürov Cinayət Məcəlləsinin 311.3.1, 311.3.2, 311.3.3 (külli miqdarda rüşvət alma) və 312-1.1-ci (nüfuz alveri) maddələri ilə ittiham olunurdu. İşçiləri isə sadəcə rüşvət alma maddələri ilə ittiham edilirdilər.