Rüşvət almaqda ittiham olunan sabiq hakim barədə qərar verlib

Bərdə Rayon Məhkəməsinin sabiq hakimi Elsun Əhmədovun barəsində olan qərardan verilən kassasiya şikayəti üzrə məhkəmə prosesi yekunlaşıb. Ali Məhkəmədə, hakim İlqar Cəfərovun sədrliyi ilə keçirilən prosesdə qərar qəbul olunub. Qərara əsasən, Əhmədovun şikayəti təmin edilməyib. Bu, aşağı instansiya məhkəməsinin daha əvvəl çıxardığı qərarın qüvvədə saxlanılması deməkdir. Beləliklə, bu işdə sabiq hakimin cəzası qəti olaraq təsdiqlənmiş oldu.

Elsun Əhmədova Gəncə Ağır Cinayətlər Məhkəməsinin hökmü ilə 5 il müddətinə azadlıqdan məhrumetmə cəzası verilmişdi. Cəzasını çəkməyə başlamaq üçün o, məhkəmə zalında həbs olunmuşdu. Sabiq hakim bu hökmdən narazı qalaraq apellyasiya şikayəti vermişdi. Lakin Gəncə Apellyasiya Məhkəməsi aşağı instansiya məhkəməsinin qərarını qüvvədə saxlamışdı. Kassasiya şikayətinin də rədd edilməsi ilə 5 illik həbs cəzası qanuni qüvvəyə minib.

Qeyd edək ki, Əhmədov Elsun Məzahir oğlu Bərdə Rayon Məhkəməsinin hakimi kimi çalışarkən cinayət törətməkdə şübhəli bilinirdi. Şübhələr ondan ibarət idi ki, o, Cinayət Məcəlləsinin 234.2-ci maddəsi ilə təqsirləndirilən bir şəxsə yüngül cəza təyin etmək müqabilində onun ailə üzvlərindən külli miqdarda pul vəsaitini rüşvət kimi almışdı. İş üzrə ilkin sübutlar toplandıqdan sonra Əhmədov şübhəli şəxs qismində tutulmuşdu. Fevralın 8-də ona Cinayət Məcəlləsinin 311.3.3-cü maddəsi (külli miqdarda rüşvət alma) ilə ittiham elan edilmişdi. İstintaq orqanının vəsatəti əsasında barəsində məhkəmənin qərarı ilə əvvəlcə ev dustaqlığı növündə qətimkan tədbiri seçilmişdi.