Rusiyanın dağ yəhudilərinə azərbaycanlı rejissorun filmi təqdim olunub (FOTO)

Rusiya Federasiyasının paytaxtı Moskva şəhərində, Rusiya Dağ Yəhudiləri Birliyinin Mədəniyyət Mərkəzində mühüm bir tədbir keçirilib. Azərbaycanlı rejissor Rüfət Əsədovun “Ana duası” adlanan filminin təqdimat mərasimi uğurla baş tutub. Bu təqdimat mərasiminin təşkili Beynəlxalq Dağ Yəhudiləri Fondunun və "Sholumi" Mədəniyyət Mərkəzinin təşəbbüsü ilə həyata keçirilib.

Bu ekran əsəri Azərbaycanın Oğuz rayonunda məskunlaşmış Dağ yəhudilərinin tarixi haqqında bəhs edir. Film Azərbaycan və yəhudi xalqları arasında formalaşan tarixi dostluğu tərənnüm edir. Eyni zamanda, sənədli film Dağ yəhudilərinin İsraildə Azərbaycanın təbliği istiqamətində gördükləri əhəmiyyətli işlərə həsr olunub. Bu məqamlar xalqlarımızın sarsılmaz tarixi dostluq əlaqələrini bir daha nümayiş etdirir.

Filmin əsas qəhrəmanı ravvin Şmuel Simantovdur. O, Oğuzda doğulub, lakin hazırda İsraildə yaşayır və Azərbaycan diasporunun fəal üzvlərindən biridir. Ekran əsərinin prodüseri vəzifəsini də İsraildəki Azərbaycan diasporunun fəallarından olan Shaul Siman-Tov yerinə yetirib. Qeyd etmək lazımdır ki, “Ana duası” rejissor Rüfət Əsədovun Dağ yəhudiləri mövzusunda çəkdiyi sayca yeddinci filmdir.