Qvineya Bisauda hərbi çevriliş olub

Hərbçilər Qərbi Afrika dövləti olan Qvineya-Bisauda hakimiyyəti ələ keçiriblər. Xarici KİV-lərə əsasən, bu hadisə ölkədə seçkilərin keçirilməsindən qısa müddət sonra baş verib.

Məlumatlara görə, ölkənin prezidenti Ömər Sissoko Embalo saxlanılıb. Onunla birlikdə daxili işlər nazirinin və Silahlı Qüvvələrin Baş qərargah rəisinin də saxlanıldığı bildirilir. Seçkilər bu sahil dövlətində ötən bazar günü keçirilmişdi. Seçkilərin ilkin nəticələrinin növbəti gün elan edilməsi planlaşdırılırdı.

Seçkilərdə əsas namizədlər hazırkı prezident Ömər Sissoko Embalo və Fernando Diyas idi. Səlahiyyət müddəti bitmiş prezident və onun rəqibi səsvermənin yekunlaşmasından sonra hər ikisi özlərini qalib elan etmişdilər. Bu, ölkədə siyasi gərginliyi artırırdı. Hərbçilərin hakimiyyətə müdaxiləsi məhz bu gərgin vəziyyətdə baş tutdu.

Qvineya-Bisau Seneqal və Qvineya ilə həmsərhəd kiçik sahil dövlətidir. Ölkə 1974-cü ildə müstəqillik qazanıb. Müstəqilliyini elan etdiyi tarixdən 2020-ci ilə qədər dövlətdə ən azı doqquz çevriliş hadisəsi yaşanıb. Bu hadisə ölkədə siyasi sabitliyin zəif olduğunu bir daha təsdiqləyir və ölkənin qeyri-sabit keçmişini davam etdirir.