Qızıl qaçaqmalçılığında ittiham olunan hərbi attaşenin sabiq baş köməkçisinin işi məhkəməyə göndərilib

İstanbulda 70 kiloqram qızılla saxlanılan polkovnik-leytenant Qəhraman Məmmədovun cinayət işi üzrə məhkəmə prosesinin hazırlıq iclası başa çatıb. Azərbaycan Silahlı Qüvvələrinin ABŞ-dakı hərbi attaşesinin sabiq baş köməkçisi olmuş Məmmədov barəsində Dövlət Təhlükəsizliyi Xidmətində (DTX) başlanmış iş Bakı Hərbi Məhkəməsinə göndərilib.

Prosesə hakim Fikrət Əliyev sədrlik edib. İclas zamanı təqsirləndirilən şəxsin anket məlumatları dəqiqləşdirildi və ona hüquq, vəzifələri izah edildi. Məhkəmə işin baxışa verilməsi barədə qərar qəbul etdi. İşin əsas məhkəmə baxışı 28 noyabra təyin olunub.

DTX-nin Mətbuat xidmətinin məlumatına görə, cinayət təqibi Azərbaycan vətəndaşlarının digər ölkə vətəndaşları ilə birlikdə qaçaqmalçılıq cinayətləri törətməsi faktı ilə əlaqədardır. Araşdırmalar zamanı ABŞ-dakı hərbi attaşenin baş köməkçisi vəzifəsində xidmət etmiş polkovnik-leytenant Qəhraman Məmmədovun əsas şübhəli olduğu müəyyən edildi. O, digər Azərbaycan və xarici ölkə vətəndaşları ilə sövdələşərək, qabaqcadan əlbir olan bir qrup şəxs halında, Birləşmiş Ərəb Əmirliklərindən Türkiyəyə daşınan xüsusilə külli miqdarda qızıl külçələrin qaçaqmalçılıq yolu ilə gömrük sərhədindən keçirilməsində iştirak edib.

Hadisə 22 noyabr 2024-cü ildə baş verib. Diplomatik statusa malik olan Məmmədov ABŞ-dan Türkiyəyə gəlib. O, əvvəlcədən razılaşdığı şəxs tərəfindən BƏƏ-dən gətirilərək İstanbul Beynəlxalq Hava Limanında gömrük nəzarətindən kənar saxlanılan çantanı götürüb. Qəhraman Məmmədov diplomatik pasportundan və vəzifə səlahiyyətlərindən qəsdən istifadə edərək qızıl külçələri gömrük sərhədindən bəyan etmədən keçirib. Daha sonra, o, həmin qızılı şərikliyinə verəcəkdi. Məmmədov taksi ilə hotellərdən birinə hərəkət edərkən Türkiyə hüquq-mühafizə orqanları tərəfindən saxlanılıb. Çantaya baxış keçiriləndə, içərisində 10,391,970.08 manat dəyərində olan 70 kiloqram qızıl külçələr aşkar edilərək götürülüb. Araşdırmalar nəticəsində hava limanında qeyd olunan saxlanc yerində gömrükdən keçməmiş daha 14 kiloqram qızıl külçələrin olduğu əlavə bir çanta da tapılıb.

Qəhraman Məmmədov DTX-də aparılan cinayət işi üzrə Azərbaycan Respublikası Cinayət Məcəlləsinin bir neçə maddəsi ilə ittiham olunur. Bu maddələr qabaqcadan əlbir olan bir qrup şəxs halında, qulluq mövqeyindən istifadə etməklə qaçaqmalçılıq (12.1, 206.3.2, 12.1-1, 206.3.3) və vəzifə səlahiyyətlərindən sui-istifadə etmə (12.1-1, 341.1) hərəkətlərini əhatə edir. Qeyd edək ki, Bakı Hərbi Məhkəməsi onun barəsində həbs qətimkan tədbiri seçib. İşin baxış iclası ayın sonuna, noyabrın 28-nə təyin edilib.