Qars, Ərzurum və İğdırdan olan jurnalistlər Qarabağa səfər ediblər - FOTO

Türkiyə KİV-in Qars, Ərzurum və İğdırdan gələn 15 nəfərlik nümayəndə heyəti Qarabağa növbəti media səfərini gerçəkləşdirib. Jurnalistlər Ağdam, Xocalı və Xankəndi şəhərlərinə yollanıblar. Bu səfər, iki ölkə arasındakı media əlaqələrini gücləndirmək, eyni zamanda azad edilmiş ərazilərdəki genişmiqyaslı bərpa və yenidənqurma işlərini beynəlxalq mediada geniş işıqlandırmaq məqsədi daşıyır.

Səfər çərçivəsində media nümayəndələri ilk olaraq Xocalı rayonundakı Əsgəran qalasında oldular. Qonaqları Xankəndi şəhəri, Ağdərə və Xocalı rayonlarında Bərpa, Tikinti və İdarəetmə Xidmətinin əməkdaşları qarşıladılar. Türkiyəli jurnalistlərə qalanın tarixi haqqında ətraflı məlumat verildi. Bildirilib ki, qala XVIII əsrdə Qarabağ xanı Pənahəli xan tərəfindən inşa edilib. Əsgəran qalası Qarabağ xanlığının şərq qapısı kimi tanınırdı və əsas funksiyası müdafiə idi.

Jurnalistlər daha sonra Xocalı şəhərinə səfər edərək burada aparılan geniş tikinti-quruculuq və abadlıq işləri ilə tanış oldular. Onlar Xocalıya qayıdan sakinlərlə görüş keçirib, onların yaşadıqları təəssüratları və düşüncələrini öyrəndilər. Qeyd edildi ki, “Böyük Qayıdış” Dövlət Proqramı çərçivəsində artıq Xocalı şəhərinə və yeddi kəndə köç prosesi uğurla həyata keçirilib. Bu, bölgədə həyatın bərpası istiqamətində atılan mühüm addımdır.

Səfərin növbəti və son dayanacağı Xankəndi şəhəri oldu. Media nümayəndələri burada yerləşən Qarabağ Universitetini ziyarət etdilər. Qonaqlara bu yeni ali təhsil müəssisəsinin fəaliyyəti, tədris prosesi və gələcək planları barədə məlumat verildi. Türkiyəli jurnalistlərin Qarabağa səfərləri azad edilmiş ərazilərdəki yenidənqurma proseslərinin beynəlxalq səviyyədə yayılmasına xidmət edir və bu ərazilərə olan marağı artırır.