Qahirədə Zəfər Günü və Dövlət Bayrağı Günü münasibətilə tədbir keçirilib (FOTO)

Azərbaycanın Misirdəki səfirliyinin təşkilatçılığı ilə Qahirədə 8 Noyabr - Zəfər Günü və 9 Noyabr - Dövlət Bayrağı Günü münasibətilə tədbir keçirildi. Bu xüsusi mərasimdə geniş heyət iştirak edirdi. Azərbaycan icmasının üzvləri, Misirin dövlət qurumları və vətəndaş cəmiyyəti təşkilatlarının nümayəndələri, dost ölkələrin diplomatik nümayəndəliklərinin rəhbərləri, eləcə də yerli və xarici media təmsilçiləri tədbirdə iştirak etdilər.

Mərasim Azərbaycanın Dövlət Himninin səsləndirilməsi ilə başladı. Daha sonra ölkəmizin ərazi bütövlüyü uğrunda şəhid olanların xatirəsi bir dəqiqəlik sükutla yad edildi. Tədbir çərçivəsində şanlı Qarabağ Zəfərinə həsr olunmuş videoçarx və fotoşəkillər nümayiş etdirilib. Səfir Elxan Poluxov öz çıxışında Ali Baş Komandan Prezident İlham Əliyevin rəhbərliyi ilə Azərbaycan Ordusunun 44 günlük müharibədə qazandığı zəfərin əhəmiyyətindən danışdı. O, Şuşanın azad olunması əməliyyatının dünya hərb tarixi üçün unikal sayıldığını qeyd etdi. Səfir vurğuladı ki, son 30 il ərzində Azərbaycan xalqı torpaqlarının işğalı ilə barışmadı və ərazi bütövlüyünün bərpası yolunda sarsılmaz iradə nümayiş etdirdi.

E. Poluxov həmçinin Misirin sülh səyləri ilə bağlı danışaraq, Azərbaycanın beynəlxalq diplomatiyadakı yerini açıqladı. O, Prezident İlham Əliyevin Misir Prezidenti Əbdülfəttah əs-Sisinin və ABŞ Prezidenti Donald Trampın həmsədrliyi ilə keçirilən Şarm əl-Şeyx Sülh Sammitində iştirakını xatırlatdı. Səfirin sözlərinə görə, Azərbaycan Fələstin münaqişəsinin sülh yolu ilə həllini tam dəstəkləyir və bu istiqamətdə əlindən gələni edir. O, çıxışında Dövlət Bayrağı Gününün yaranma tarixinə də yer ayırdı. Azərbaycanın üçrəngli milli bayrağı 1918-ci il noyabrın 9-da Azərbaycan Demokratik Cümhuriyyətinin hökuməti tərəfindən qəbul edilib. 2009-cu ildən isə Prezident İlham Əliyevin sərəncamına əsasən, hər il noyabrın 9-u Dövlət Bayrağı Günü kimi qeyd edilir. Bayrağımız milli suverenliyin simvolu, eyni zamanda Türk milli mədəniyyətinə, demokratik prinsiplərə və İslam sivilizasiyasına sədaqətimizi göstərir.