Özəl sektor, akademik dairələr və tədqiqatçılar WUF13-ə dəvət olunur

Bu il Bakıda keçiriləcək Ümumdünya Şəhərsalma Forumunun On Üçüncü sessiyası (WUF13) ilə bağlı maraqlı tərəflər məlumatlandırma sessiyalarına dəvət olunur. WUF13 Azərbaycan Əməliyyat Şirkəti özəl sektor nümayəndələrini, akademik dairələri və tədqiqatçıları bu tədbirlərə qoşulmağa çağırır. Bu sessiyalar tərəfdaşlar üçün təşkil olunan silsilə tədbirlər çərçivəsində həyata keçirilir. Bu silsilənin ilk görüşü 2026-cı il yanvarın 19-da təşkil ediləcək.

Baş tutacaq sessiyaların əsas məqsədi milli təmsilçiliyin və iştirakçılığın genişləndirilməsidir. İştirakçılar WUF13 haqqında ümumi təqdimatla tanış olacaqlar. Tədbir həm də biznes nümayəndələri, akademik dairələr və tədqiqatçılar üçün forumda iştirak imkanları barədə ətraflı məlumat verir. WUF13 şəhərsalma sahəsində beynəlxalq dialoq və əməkdaşlıq üçün yaradılmış mühüm platformadır. Maraqlanan şəxslər qeydiyyat üçün müraciət edərək özləri haqqında qısa məlumatı qeyd etməli və müvafiq sessiyanın vaxtını seçməlidirlər.

WUF şəhərsalma sahəsində ən nüfuzlu və geniş iştirakçılığa malik qlobal konfrans hesab olunur. Tədbir cəmiyyəti düşündürən ən aktual məsələləri müzakirəyə çıxarır. Buraya sürətli urbanizasiyanın icmalara, şəhərlərə, iqtisadiyyata, iqlim dəyişmələrinə və siyasətlərə təsiri kimi mövzular daxildir. Forum milli, regional və yerli hökumətləri, akademik dairələri, biznes liderlərini, şəhərsalma mütəxəssislərini və vətəndaş cəmiyyətini bir araya gətirmək məqsədi daşıyır.

WUF13 qurum və təşkilatlara tədbirin əsas mövzusuna uyğun tədbirlər təşkil etmək imkanı verir. Forumun mövzusu "Hər kəs üçün yaşayış yerləri: təhlükəsiz və dayanıqlı şəhərlər və yaşayış məskənləri" olaraq müəyyənləşib. Tədbir 17–22 may 2026-cı il tarixlərində Bakıda keçiriləcək. Hazırda WUF13 çərçivəsində təşkil olunacaq tərəfdaş tədbirləri üzrə qeydiyyat davam edir. Bu tərəfdaş tədbirləri üçün müraciətlərin qəbulu 2026-cı il yanvarın 29-da yekunlaşacaq.