"Oxford Economics": Böyük Britaniyanın dövlət borcu 20 ildə üç dəfə artıb

“Oxford Economics” konsaltinq şirkətinin təhlilinə görə, Böyük Britaniyanın dövlət borcu səviyyəsi 2005-2025-ci illər arasında üç dəfə artıb. Bu yüksəliş bütün inkişaf etmiş ölkələrin iqtisadiyyatları arasında qeydə alınan ən yüksək artım tempidir. “The Daily Telegraph” qəzeti bu məlumatı yayaraq, Birləşmiş Krallığın maliyyə vəziyyətinin ağırlaşmasına diqqət çəkib.

Hazırda Birləşmiş Krallığın dövlət borcu 2,9 trilyon funt sterlinqə (3,8 trilyon dollar) çatır. Bu rəqəm ölkənin Ümumi Daxili Məhsulunun (ÜDM) təxminən 100%-ni təşkil edir. Ölkə hər il bu borc üzrə faizlərin ödənilməsinə 100 milyard funt sterlinqdən (130 milyard dollar) çox vəsait xərcləyir. Nəşr bildirir ki, son 20 il ərzində yalnız ABŞ və İspaniya oxşar borc artımı templərini qeydə ala biliblər.

Kembric Universitetinin professoru Yajit Çadha bu yüksək dövlət borcunun Britaniya siyasi-iqtisadi modelinin uğursuzluğunu göstərdiyini düşünür. O qeyd edib ki, fiskal sistemin uğursuzluğa düçar olması açıq şəkildə görünür. Professor əlavə edib ki, borcun ÜDM-ə nisbətinin dayanıqlı inkişaf yoluna çıxması mümkün olmayıb. Bu artım tempi iqtisadiyyat üçün ciddi problem yaradır.