Oqtay Qasımov: "Bakı Fond Birjası bu yaxınlarda yeni interaktiv statistik platformasını təqdim edəcək"

Bakı Fond Birjası (BFB) bazar məlumatlarının əlçatanlığını artırmaq üçün nəzərdə tutulan yeni bir interaktiv statistik platformanı bazara təqdim etməyə hazırlaşır. Bu barədə məlumatı BFB-nin İdarə Heyəti sədrinin müavini Oqtay Qasımov Bakıda keçirilən IX Beynəlxalq Bank Forumunun ikinci günündə açıqlayıb. Qasımov qeyd etdi ki, Birja ilin sonuna qədər bu yeni interaktiv həlli istifadəyə verəcək. Yeni sistem həm bazar iştirakçılarının qərarvermə imkanlarını genişləndirəcək, həm də kapital bazarlarında şəffaflığın artırılmasına əlavə töhfə verəcək.

Hazırda birjanın rəsmi saytında yerləşən "Bazar icmalı" bölməsi investorlar, treyderlər və analitiklər üçün əsas məlumat mənbəyi olaraq qalır. Vətəndaşlar bu bölmədən bazarda dövriyyədə olan qiymətli kağızları, istiqrazları və fərqli bazar seqmentlərini tam şəkildə görə bilirlər. Bununla birlikdə, BFB yaxın zamanda daha geniş funksionallığa malik interaktiv statistik sistem təqdim etməklə məlumatlara çıxışı daha da asanlaşdıracaq.

O. Qasımovun sözlərinə görə, yeni sistem analitik məlumatlara çıxışı asanlaşdıracaq və bazarın dərinliyi barədə daha əhatəli təsəvvür yaradacaq. Bu platforma sayəsində bazar iştirakçıları daha doğru qərarlar verə biləcəklər. BFB rəsmisi hesab edir ki, texnologiyanın bu şəkildə tətbiqi şəffaflığı yüksəldəcək və yerli kapital bazarlarının inkişafına mühüm dəstək verəcək.