"OPEC+" dekabrda neft hasilatının gündə 137.000 barel artırılmasını müzakirə edəcək

OPEC+ qrupuna daxil olan səkkiz ölkənin nazirləri noyabrın 2-də görüşəcək. Onlar dekabr ayından etibarən neft hasilatının gündə 137 min barel artırılmasını nəzərdən keçirəcəklər.

Bloomberg-in mənbələrə istinadən yaydığı məlumata görə, alyansın yekun planları hələ formalaşmayıb. Hazırda qlobal neft qiymətləri təklif bolluğu, Çində tələbatın zəifləməsi və ABŞ-nin Rusiyaya tətbiq etdiyi sanksiyalar fonunda dəyişkən olaraq qalır. Bu qərarın qəbul edilməsi ABŞ-Çin ticarət danışıqlarının nəticəsindən də asılı ola bilər.

Mütəxəssislərin böyük əksəriyyəti hasilatın artırılmasını gözləyir. Bloomberg tərəfindən sorğu edilən on neft treyderi, emal şirkəti rəhbəri və analitikdən doqquzu hasilatın məhz gündə 137 min barel artırılacağını proqnozlaşdırıb. Yalnız bir iştirakçı daha əhəmiyyətli bir artım olacağını düşünür. "OPEC+" üzvü olan səkkiz ölkə oktyabr ayından etibarən bazara əvvəllər azaldılmış gündəlik 1,67 milyon barel həcmində neft qaytarır. Rusiyaya qarşı sanksiyalardan sonra ötən həftə bahalaşan London neft fyuçersləri barel üçün 66 dollar səviyyəsində satılır.

Neft hasilatını artırmaq qərarı Səudiyyə Ərəbistanının bazar payını geri qaytarmaq istəyi ilə bağlıdır. Krallıq son illərdə bu payı Amerika şist nefti istehsalçıları kimi rəqiblərə itirmişdi. Lakin bu addımın arxasında siyasi mülahizələr də var. Səudiyyə Ərəbistanının vəliəhd şahzadəsi Məhəmməd bin Salman noyabrın 18-də Ağ Evə səfər etməyə hazırlaşır. Prezident Donald Tramp dəfələrlə neft qiymətlərinin aşağı salınmasına çağırıb, Səudiyyə Ərəbistanı isə bu qərarla ABŞ ilə əlaqələrini gücləndirmək niyyətini göstərmək istəyir.