Nyu-Yorkda yaşayan azərbaycanlılar üçün səyyar konsulluq xidməti təşkil olunub

ABŞ-nin Nyu-York şəhərində Azərbaycan Respublikası vətəndaşları üçün növbəti səyyar konsulluq xidməti təşkil edilib. Bu xidmət Nyu-York şəhərində və ətraf ştatlarda məskunlaşan vətəndaşlar üçün nəzərdə tutulub.

Verilən məlumata görə, səyyar konsulluq təşkilatı çərçivəsində 40-dan çox vətəndaş müxtəlif konsulluq xidmətlərindən yararlanıb. Səyyar xidmətin əsas məqsədi ABŞ-də yaşayan həmvətənlərimiz üçün bu prosedurların əlçatanlığını artırmaq və onların daha operativ həyata keçirilməsini təmin etməkdir.

Vətəndaşlara göstərilən xidmətlər olduqca geniş olub. Buraya ümumvətəndaş pasportunun yenilənməsi, "Qayıdış Şəhadətnaməsi"nin rəsmiləşdirilməsi, konsulluq qeydiyyatına alınma daxil idi. Həmçinin, notariat hərəkətlərinin aparılması, vətəndaşlıq məsələlərinin həlli, vətəndaşlıq vəziyyəti aktlarının dövlət qeydiyyatı və sənədlərin sorğu əsasında alınması üzrə işlər görülüb.

Qeyd edək ki, ABŞ-də səyyar konsulluq xidməti ilk dəfə Azərbaycanın ABŞ-dəki fövqəladə və səlahiyyətli səfiri Xəzər İbrahimin təşəbbüsü ilə təşkil olunmuşdu. Bu ənənəvi konsulluq xidmətləri artıq bir neçə ildir ki, ABŞ-nin müxtəlif şəhər və ştatlarında həyata keçirilir, bu da Azərbaycan Respublikası vətəndaşları üçün böyük rahatlıq yaradır.