Nizami Gəncəvi Beynəlxalq Mərkəzi Çin tərəfdaşları ilə əlaqələrini genişləndirir (FOTO)

Nizami Gəncəvi Beynəlxalq Mərkəzinin (NGBM) nümayəndə heyəti son zamanlar Pekin şəhərində yüksək səviyyəli görüşlər həyata keçirib. Bu səfərin məqsədi Mərkəzin Çinlə olan strateji əlaqələrini möhkəmləndirmək və bir sıra qlobal məsələlərdə əməkdaşlığı genişləndirməkdir. Səfər Çin Hökumətinin Avropa məsələləri üzrə sabiq Xüsusi Nümayəndəsi, səfir Vu Honqbo ilə görüşlə başlayıb. Bu ilkin görüşlərdə tərəflər əməkdaşlıq imkanlarını nəzərdən keçirib, həmçinin Çin nümayəndələrinin XIII Qlobal Bakı Forumunda iştirakını müzakirə ediblər. NGBM beynəlxalq dialoqun təşviqində öz rolunu artırmaq üçün bu cür yüksək səviyyəli diplomatik əlaqələrə böyük önəm verir.

Nümayəndə heyəti daha sonra Çinin aparıcı iqtisadçıları və alimləri ilə də görüşüb. Onlar Tsinghua Universitetinin Manfsild Friman professoru, "Çin və Dünya İqtisadiyyatı Mərkəzinin" direktoru Li Daokui, eləcə də Mərkəzin İdarə Heyətinin üzvü və Şvartsman Kollecinin İcraçı dekanı Dr. David Pan ilə fikir mübadiləsi aparıb. Görüşlərdə əsas diqqət Çin nümayəndələrinin XIII Qlobal Bakı Forumunda iştirakı məsələsinə yönəlib. Səfərin növbəti günündə nümayəndə heyəti Çin Xalq Xarici İşlər İnstitutunun prezidenti Vu Ken və institutun vitse-prezidenti Yan Tao ilə də görüşüb. Tərəflər humanitar dialoq, qlobal məsələlərdə hər iki qurumun birgə fəaliyyət perspektivləri və çoxtərəfli əməkdaşlıq barədə danışıblar.

Proqram çərçivəsində Dünya Bankının sabiq baş iqtisadçısı və baş vitse-prezidenti professor Justin Yifu Lin ilə də görüş keçirilib. Bu görüşdə regional iqtisadi tendensiyalar və dayanıqlı inkişaf strategiyaları ətrafında geniş müzakirələr aparılıb. Görüş iştirakçıları həmçinin 2026-cı ildə keçiriləcək XIII Qlobal Bakı Forumu, Ümumdünya Şəhərsalma Forumu və Mərkəzin BMT çərçivəsində təşkil etdiyi tədbirlər barədə də məlumat mübadiləsi ediblər. Pekindəki bu fəaliyyət NGBM-in Çin tərəfdaşları ilə strateji əlaqələrinin daha da möhkəmlənməsinə və Mərkəzin global dialoqun təşviqində rolunun genişlənməsinə mühüm katqı verib.