Nazir müavini: "Azərbaycan əsrlərdir körpülər ölkəsidir, indi isə rəqəmsal körpü yaradırıq"

Rəqəmsal inkişaf və nəqliyyat nazirinin müavini Saməddin Əsədov Bakıda keçirilən Qlobal Gənclər Günündə çıxışı zamanı mühüm məsələlərə toxunub. O qeyd edib ki, hazırda dünyada süni intellektdən səmərəli istifadə etmək üçün təcrübə ilə yanaşı yeni düşüncələrə ehtiyac var. Nazir müavini bildirib ki, bu gün sadəcə bir tədbir yox, bir hərəkatın başlanğıcıdır. Sabah "Ümumdünya Telekommunikasiya İnkişafı Konfransı 2025" (WTDC-25) öz işinə başlayır. Əsədov deyib ki, biz gələcəyin rəqəmsal dünyasını quracaq insanlarla başlamağı seçirik.

O, WTDC-25-in mövzusunun universal, mənalı və əlçatan bağlantı, habelə inklüziv və davamlı rəqəmsal gələcək ilə bağlı olduğunu xatırladıb. Bu sadəcə bir dünya deyil, yalnız bu gələcəkdə yaşayacaq nəsil tərəfindən yerinə yetirilə bilən bir vəddir. S. Əsədov qeyd edib ki, dünyada rəqəmsal uçurumu aradan qaldırmaq, şəbəkələri təmin etmək və süni intellektdən düzgün istifadə etmək üçün yeni fikirlər gərəklidir. Bugünkü dialoq məhz bu məqsədlərə çatmaq üçün bir platformadır. Gənclərin yeni düşüncələri bu prosesdə böyük əhəmiyyət daşıyır.

Nazir müavini Azərbaycanın tarixi roluna diqqət çəkib. O vurğulayıb ki, Azərbaycan əsrlər boyu körpülər ölkəsi olub. Tarixi İpək Yolu Şərqi və Qərbi məhz bizim torpaqlarımız vasitəsilə birləşdirirdi. Bu gün isə biz tamamilə yeni növ İpək Yolu, yəni rəqəmsal İpək Yolu qururuq. Rəqəmsal İpək Yolu layihəsi Xəzər dənizindən keçən fiber-optik kabellərlə Şərq və Avropa arasında telekommunikasiya dəhlizi yaradır. Bu dəhliz Azərbaycan və qonşu ölkələr vasitəsilə əlaqəni təmin edir. Əsədov yekunlaşdıraraq bildirib ki, biz sadəcə əlaqə haqqında danışmırıq, biz onu fiziki olaraq qururuq. Bu layihə rəqəmsal bağlantının gücləndirilməsi baxımından region üçün strateji əhəmiyyət daşıyır.