Nazir: Müəllim məktəbə "müştəri yeri" kimi baxırsa, o, mənim üçün müəllim deyil

Elm və təhsil naziri Emin Əmrullayev dövlət məktəblərində çalışan müəllimlərin peşə etikası haqqında kəskin fikirlər səsləndirib. Nazir qeyd edib ki, əgər müəllim məktəbə yalnız şəxsi qazanc yeri, yəni "müştəri yeri" kimi baxırsa, o, onun üçün müəllim sayılmır. Bu mühüm məsələ nazirin "İTV"də yayımlanan "Diqqət Mərkəzi" proqramındakı çıxışı zamanı diqqət mərkəzinə gəlib.

Əmrullayev xüsusilə dərs dediyi siniflərdən əlavə repetitorluq üçün şagird yığmağa çalışan pedaqoqlara toxunub. O, misal gətirərək bildirib ki, əgər müəllim 6 sinifdə dərs keçir və hər sinifdən 15 uşağın repetitorluğa müraciət edəcəyini düşünərək həyat səviyyəsini yüksəltməyi planlayırsa, bu, qəbuledilməzdir. Müəllim məktəbə gəlir, əməkhaqqını alır, lakin o, bu əməyin əvəzini birbaşa sinifdə verməlidir. Kim istəsə, dərsdən sonra özəl sektorda fəaliyyət göstərə bilər, bu, hər bir vətəndaşın hüququdur. Lakin dövlət sektorunda çalışan müəllimin əsas məqsədi şəxsi qazancını artırmaq yox, məktəbə və uşaqlara xidmət etmək olmalıdır. Əgər kimsə bu prinsipləri pozursa və özəl qazancı məktəbin qarşısında üstün tutur, o zaman bu, müəllimlik mövqeyi deyil. Çünki müəllimlik vicdan, məsuliyyət və düzgün münasibət tələb edən bir peşədir.

Emin Əmrullayev həmçinin müəllimlərdən əsas gözləntilərin qiymətləndirilməsi metoduna aydınlıq gətirib. O vurğulayıb ki, biz heç vaxt müəllimin sertifikasiyada mütləq 60 bal toplamalı olduğunu demirik. Məsələ sadəcə balda deyil. Məsələn, müəllimin hər gün bir uşağa 5 bal, digərinə 10 bal qazandırması fəaliyyətin simvolik tərəfidir. Məktəb müəllimindən əsas gözlənti yüz faiz biliklə deyil, uşağa olan münasibətlə ölçülür. Nazir əlavə edib ki, həyatını tamamilə məktəbə və şagirdlərə həsr edən insanlar var. Nazirliyin əsas hədəfi məhz bu cür müəllimləri tapıb təhsil sisteminə qaytarmaqdır.