Naxçıvanda 9 ayda büdcə gəlirlərinin 63 %-i yerli yığımlar hesabına formalaşıb

Naxçıvan Muxtar Respublikasının büdcə gəlirləri 2024-cü ilin yanvar-sentyabr aylarında əsasən daxili mənbələr hesabına formalaşıb. Maliyyə Nazirliyinin məlumatına görə, bu dövrdə ümumi büdcə gəlirlərinin 63,1 %-i yerli yığımlar hesabına təmin edilib. 9 ay ərzində büdcəyə 325,6 milyon manat vəsait daxil olub. Bu məbləğin 205,6 milyon manatı yerli gəlirlər təşkil edib, qalan 120 milyon manat isə dotasiya (mərkəzi subsidiya) şəklində alınıb.

Naxçıvanın mərkəzi dotasiyadan asılılığının azalması müşahidə olunur. Cari ilin doqquz ayında dotasiyanın həcmi ötən ilin eyni dövrü ilə müqayisədə 29,5 % azalıb. Bu azalma tendensiyası muxtar respublikanın büdcəsinin formalaşmasında daxili maliyyə mənbələrinin rolunun artdığını göstərir. Yerli gəlir bazasının genişlənməsi, vergi və qeyri-vergi daxilolmalarının artırılması bu prosesə təsir edir. Eyni zamanda, fiskal intizamın gücləndirilməsi Naxçıvanın büdcəsinin getdikcə daha çox öz resurslarının hesabına təmin olunmasına imkan yaradır.

Dotasiyanın həcmindəki azalma son üç ildə sabit bir xətt izləyib. 2022-ci ildə dotasiya 425 milyon manat təşkil etdiyi halda, bu rəqəm 2023-cü ildə 315 milyon manata düşüb. 2024-cü ildə isə dotasiya cəmi 185,2 milyon manat olub. Beləliklə, qeyd olunan dövrdə, son 3 ildə dotasiyanın ümumi məbləği 239,9 milyon manat və yaxud 56,4 % azalıb. Bu göstəricilər Naxçıvanın maliyyə dayanıqlığını artırmaq və büdcənin özünü təminetmə səviyyəsini yüksəltmək üçün atdığı addımların effektivliyini təsdiqləyir.