Misir Qətərin investisiya layihəsindən 3.5 milyard dollar əldə edəcək

Misir bu ilin dekabr ayında Qətərin dəstəklədiyi böyük bir investisiya layihəsindən əhəmiyyətli vəsait əldə etməyə hazırlaşır. Ölkə “Aləm ər-Rum” şəhərinin tikintisi layihəsi üzrə 3.5 milyard dollar məbləğində vəsait alacaq. Razılaşma Misirə bu layihə çərçivəsində inşa ediləcək yaşayış binalarından da pay götürmək hüququ verir.

Bu məlumatı Misirin Baş naziri Mustafa Mədbuli açıqlayıb. Qeyd olunub ki, Qətər dövləti Misirin şimalında, Matruh vilayətində yerləşən “Aləm ər-Rum” layihəsinə təxminən 30 milyard dollar sərmayə yatıracaq. Layihə Qətərin “Diyar” şirkəti tərəfindən həyata keçirilir və ümumi sahəsi 20.5 milyon kvadratmetrdir. Bu böyük təşəbbüs Qətərin dünyadakı ən iri daşınmaz əmlak layihələrindən biri hesab edilir.

“Aləm ər-Rum” ərazisində ilin hər fəslində fəaliyyət göstərəcək müasir bir şəhər salınması planlaşdırılır. Bu şəhərdə otellər, yaşayış məhəllələri, ticarət mərkəzləri, xəstəxanalar, məktəblər və universitetlər tikiləcək. Baş nazir bu tikinti işlərinin geniş iqtisadi təsir göstərəcəyini də bildirdi. Layihə sayəsində 250 mindən çox daimi və müvəqqəti iş yeri yaradılacaq. Eyni zamanda, Misir büdcəsinə vergilərdən və rüsumlardan əlavə gəlirlər daxil olacaq.

Mədbuli əlavə edib ki, bu cür inkişaf proqramları sayəsində 2030-cu ilə qədər ölkənin şimal sahili 17 milyon nəfəri qəbul edə biləcək imkana sahib olacaq. Baş nazir digər bir açıqlamasında da bildirib ki, Misir gələn bazar günü rabitə sahəsində işləyən beynəlxalq şirkətlərlə 50 müqavilə imzalamağı planlaşdırır.