Mirzoyan: Bakı ilə İrəvan arasında sülh regionda yeni iqtisadi imkanlar açır

Ermənistanın xarici işlər naziri Ararat Mirzoyan Bakı ilə İrəvan arasında sülhün bərqərar olmasının region üçün yeni iqtisadi imkanlar açacağını bildirib. Nazir bu fikirləri Lüksemburqda regional təhlükəsizlik və regionlararası əlaqələr üzrə nazirlərin görüşündən əvvəl jurnalistlərə açıqlayıb. O qeyd edib ki, iki ölkə arasında sülh nəqliyyat kommunikasiyalarının və ümumi iqtisadi əlaqələrin inkişafı üçün yeni şərait yaradır.

Mirzoyan hazırda Avropa İttifaqı, Qara dəniz regionu və Mərkəzi Asiyadakı həmkarları ilə əməkdaşlıq yolları haqqında danışdığını deyib. Görüşün əsas məqsədi regionlararası əlaqələri, dayanıqlığı və təhlükəsizliyi gücləndirməkdir. Nazirə görə, Ermənistan və Azərbaycan arasında sülhün bərqərar olması, kommunikasiyaların yaxın zamanda açılması və yeni nəqliyyat infrastrukturunun yaradılması regionun inkişafına böyük perspektivlər vəd edir.

Ermənistan XİN başçısı bölgənin Avropa ilə Mərkəzi Asiyanı birləşdirən mühüm bir keçid rolu oynaya biləcəyini vurğulayıb. Geniş tərkibli iclas Avropa Komissiyası, Aİ üzv dövlətlər, Azərbaycan, Ermənistan, Gürcüstan, Moldova, Türkiyə, Ukrayna və Mərkəzi Asiya ölkələrinin nümayəndələrinin iştirakı ilə keçirilir. Görüşdə əsas diqqət Qara dəniz regionunda təhlükəsizlik məsələlərinə, həmçinin Avropa ilə Asiya arasında nəqliyyat və enerji əlaqələrinin inkişafına yönəlib.