Mergen Kepbanov: "Zəngəzur dəhlizi birliyin rəmzi və QHT-lər üçün yeni perspektivlərdir"

Türkmənistanın qeyri-hökumət təşkilatları (QHT) Türk Dövlətləri Təşkilatına (TDT) üzv ölkələrin QHT-ləri ilə daha yaxından əməkdaşlıq etməyə hazırdır. Bu əməkdaşlıq Türkmənistan üçün böyük əhəmiyyət daşıyır. CAREC-in Türkmənistandakı layihə ofisinin direktoru Mergen Kepbanov bu vacib fikirləri TDT-yə üzv ölkələrin QHT-lərinin Həmrəylik Forumunda səsləndirib.

O, Türkmənistanın vətəndaş cəmiyyətinin türk dünyasının QHT-ləri ilə çoxşaxəli qarşılıqlı əlaqələrə açıq olduğunu bildirib. Kepbanov qeyd etdi ki, onlar təcrübə mübadiləsi aparmağa, birgə layihələr həyata keçirməyə, həmçinin təhsil və mədəniyyət təşəbbüslərində iştirak etməyə tam hazırdırlar. Direktorun sözlərinə görə, Türkmənistanda QHT-lərin inkişafı dövlətin strateji kursu çərçivəsində həyata keçirilir. Bu prosesə Prezident Sərdar Berdiməhəmmədov tam dəstək verir.

M. Kepbanov öz çıxışı zamanı Zəngəzur dəhlizi layihəsinin xüsusi əhəmiyyətini vurğuladı. O, bu dəhlizi türk dünyasının ortaq gələcəyi naminə birliyin simvolu adlandırıb. Direktor bəyan edib ki, Zəngəzur dəhlizi layihəsi yalnız nəqliyyat və logistika sahəsində əməkdaşlığın genişləndirilməsi üçün imkanlar yaratmır. Bu marşrut eyni zamanda qeyri-hökumət sektorunun güclənməsi ilə bağlı yeni perspektivlər açır, regionda əlaqələri gücləndirir.