Mehriban Əliyevanın Vatikana səfəri Azərbaycanın multikultural dəyərlərin inkişafına verdiyi töhfələrin təsdiqidir - RƏY

Birinci vitse-prezident Mehriban Əliyevanın Vatikana rəsmi səfəri Azərbaycanın multikultural dəyərlərin inkişafına verdiyi töhfələrin bir daha təsdiqidir. Milli Məclisin deputatı Vüqar Rəhimzadə bu fikirləri bildirib. O qeyd edib ki, Mehriban Əliyevanın və onun rəhbərlik etdiyi Heydər Əliyev Fondunun (HAF) addımları beynəlxalq ictimaiyyətin diqqət mərkəzindədir. Bu addımlar mədəniyyətlərarası və dinlərarası dialoqun möhkəmlənməsinə, tarixi mədəni irsin qorunmasına yönəlir, həyata keçirilən layihələr isə hər zaman təqdir edilir. Deputatın sözlərinə görə, son səfər də məhz bu məqamları özündə əks etdirdi. Azərbaycanın multikulturalizm prinsipləri həm dövlət siyasətinin əsasını təşkil edir, həm də yaşayış tərzimizdir. Bugünkü mürəkkəb dünyada Azərbaycan və Müqəddəs Taxt-Taç arasında genişlənən əməkdaşlıq və dostluq əlaqələri başqa dövlətlər üçün yaxşı bir nümunədir.

Səfər çərçivəsində Mehriban Əliyeva ailə üzvləri ilə birlikdə Heydər Əliyev Fondunun dəstəyi ilə həyata keçirilən Müqəddəs Kommodilla katakombalarının bərpası layihəsinin açılış mərasimində iştirak etdi və işlərlə tanış oldu. Bu cür fəaliyyətlər Azərbaycanın humanitar siyasətinin tərkib hissəsidir. Bu siyasət mədəni irsin qorunmasına və dünya sivilizasiyasına hörmət prinsipinə əsaslanır. Bu addımlar müxtəlif dinlər və mədəniyyətlər arasında dialoqun güclənməsinə, qarşılıqlı anlaşma və tolerantlıq ənənələrinin təşviqinə yönəlib. Fondun göstərdiyi yardım nəticəsində katakombaların açılışı ilə iki tərəf arasında əməkdaşlığın yeni bir səhifəsi açıldı. Fondun prezidenti bu səfərin son 14 ildə Vatikana altıncı səfəri olduğunu qeyd edib. Bu fakt Azərbaycanın Müqəddəs Taxt-Taçla əməkdaşlığına verdiyi xüsusi önəmi göstərir. Ölkə əsrlər boyu fərqli dinlərin və mədəniyyətlərin nümayəndələrinin sülh, qarşılıqlı hörmət və harmoniya şəraitində yaşadığı bir məkandır.

Birinci vitse-prezident Mehriban Əliyeva Vatikana rəsmi səfəri çərçivəsində bir çox görüş keçirib. Roma Papası XIV Leo ilə görüş zamanı Azərbaycan ilə Vatikan arasında yaranan yüksək səviyyəli münasibətlərin vacibliyi xüsusi vurğulandı. Əlaqələr humanitar və mədəni müstəvidə dinamik şəkildə inkişaf edir, qarşılıqlı etimad və hörmət prinsipləri üzərində qurulur. Mehriban Əliyeva HAF-ın Vatikana dəstəyi ilə həyata keçirdiyi mühüm layihələrə diqqət çəkdi. Bu layihələr mədəni irsin bərpasını, elmi araşdırmaların genişləndirilməsini, mədəni mübadilələri və dini-mədəni dialoqu əhatə edir. Deputat V. Rəhimzadə həmçinin Birinci vitse-prezidentin Azərbaycanın Müqəddəs Taxt-Tacdakı səfirliyinin inzibati ofisinin rəsmi açılışında iştirak etdiyini xatırladıb. Bu diplomatik fəaliyyət ölkə həqiqətlərinin dünya ictimaiyyətinə çatdırılması baxımından çox əhəmiyyətlidir. Mehriban Əliyevanın bu səfəri iki ölkə münasibətlərində yeni bir mərhələnin başlanğıcı və Azərbaycanın humanitar diplomatiyasının növbəti parlaq nümunəsi kimi dəyərləndirilir.