Mədəniyyət Nazirliyi son günlər səsləndirilən iddialara cavab verib

Mədəniyyət Nazirliyi son günlərdə sosial media istifadəçilərinin 2004–2022-ci illərlə bağlı səsləndirdiyi iddialara aydınlıq gətirib. Qurum bildirib ki, həmin dövrdə aşkarlanan qanun pozuntuları mövcud qanunvericilik çərçivəsində araşdırılıb. Bu araşdırmalar nəticəsində hüquqi qiymət verilib və məsuliyyət tədbirləri tətbiq olunub.

Nazirlik bəzi sosial şəbəkələrdə Mədəniyyət Nazirliyinin təşkil etdiyi tədbirlərdə çıxış edən ifaçıların seçim qaydaları ilə bağlı yayılan məlumatların faktlara söykənmədiyini qeyd edir. Əgər nazirliyin tabeliyində çalışan əməkdaşlar tərəfindən qanunsuzluq hallarına yol verilməsi barədə müraciətlər daxil olarsa, qanunvericiliyə uyğun olaraq dərhal araşdırma aparılır. Zəruri hallarda toplanmış materiallar obyektiv hüquqi qiymət verilməsi üçün hüquq mühafizə orqanlarına göndərilir.

Nazirlik eyni zamanda incəsənət nümayəndələrinin dövlət tədbirlərində iştirakına şərait yaradılmaması ilə bağlı şikayətlərə də münasibət bildirib. Bu iddialar 2004-2022-ci illər dönəmini əhatə etsə də, keçən il müəyyən qüvvələr tərəfindən yenidən aktuallaşdırılmışdı. Nazirlik bu iddialara baxıb və xidməti yoxlama aparıb. Araşdırma nəticəsində konkret şəxslərin qanunsuz əməllərini sübuta yetirən faktlar və sübutlar təqdim edilməyib. Bu da səsləndirilən iddiaların əsassız olduğunu bir daha təsdiqləyir.

Mədəniyyət Nazirliyinin təşkil etdiyi rəsmi tədbirlərdə və konsert proqramlarında çıxış edən ifaçıların seçimi qaydalarına gəlincə, bu seçim tədbirin formatına, konsepsiyasına və ifaçının repertuar məzmununun bu formata uyğunluğuna əsasən aparılır. Seçim müvafiq ekspert qrupunun qərarı ilə təsdiq edilir. Qurum xatırlatmaq istəyir ki, 2004-2022-ci illər dönəmini əhatə edən keçmiş fəaliyyətlə bağlı səsləndirilən müxtəlif fikirlərlə Nazirliyin bugünkü fəaliyyətinə kölgə salınması yolverilməzdir.